संग्रहित छायाचित्र
मुंबई: लोकसभा निवडणुकीत शरद पवार गटाच्या राष्ट्रवादी काँग्रेसने तुतारी वाजवणारा माणूस या निवडणूक चिन्हावर निवडणूक लढवली होती. याचवेळी राज्यात निवडणूक आयोगाने चिन्हाशी साम्य असलेले पिपाणी हे चिन्हदेखील अनेक अपक्ष उमेदवारांना दिलेले होते. चिन्हांतील गोंधळामुळे ‘पिपाणी’ला राज्यात लाखो मते मिळाली असून त्याचा फटक शरद पवार गटाच्या उमेदवारांना बसला होता.
सातारा लोकसभा मतदारसंघातील राष्ट्रवादीचे उमेदवार शशिकांत शिंदे यांचा पराभव तर पिपाणी चिन्हामुळे झाल्याचा दावा राष्ट्रवादीचे प्रदेशाध्यक्ष जयंत पाटील यांनी केला होता. पिपाणी या चिन्हाला निवडणूक चिन्हांच्या यादीत ‘तुतारी’ असं नाव आहे. चिन्हांमध्ये साम्य आहे. त्यामुळे शरद पवार गटाला मिळणारी मतं अपक्ष उमेदवारांना मिळाली, असा दावा राष्ट्रवादीचा आहे.
