'वृक्षसेवे'चा हरित वसा

वृक्षसेवा संस्थेचे कार्य आज मोठ्या जोमात सुरू आहे. संस्थेचे सर्व सदस्य विविध भागांतून श्रमदानासाठी येतात आणि विविध पद्धतीने योगदानही देतात. संस्थेचे अध्यक्ष तापसरंजन दास यांनी सांगितले की, कार्याला सुरुवात केली, तेव्हा आम्ही केवळ ४-५ लोकच होतो. मात्र, हळूहळू काम वाढत गेलं आणि ४ वर्षांत सदस्यसंख्या सुमारे १०० च्या आसपास गेली आहे. त्यापैकी ६०-७० सदस्य अत्यंत सक्रिय आहेत. आपल्या सोयीने, जमेल तसं, जमेल त्या प्रमाणात लोक काम करत असतात. कोणावरही कसलंही बंधन नाही. कोणी रोज सकाळी येतं, तर कोणी संध्याकाळी. केवळ शनिवार - रविवार या कामासाठी वेळ देणारेही काही लोक आहेत. त्यांचाही सहभाग तेवढाच महत्त्वाचा आहे. आम्ही धानोरी भागात सुमारे २५०० झाडांची लागवड केली असून, विशाल वृक्षांचे संगोपनही आम्ही करत आहोत. या कार्यात काही लोक श्रमदान करतात. काही समयदान करतात, तर काही लोक केवळ आर्थिक मदत करतात. मात्र, अशा अनेक हातांमुळेच संस्थेच्या माध्यमातून लोकहिताची कामे होत आहेत.'

 

'काही वर्षांपूर्वी आम्ही ४-५ लोकांनी एकत्र येऊन काम सुरू केलं. समाजासाठी काही तरी करण्याची उर्मी होती. त्यातून वृक्षलागवडीचं काम सुरू केलं. मी सेवानिवृत्त बँक अधिकारी आहे. त्यामुळे आर्थिक व्यवहाराबाबतची माहिती मी दिलं. संघटन वाढवण्यासाठी प्रयत्न केले. आज आमच्या संस्थेत विविध वयोगटातील १०० सदस्य आहेत. ते सर्व त्यांच्या-त्यांच्या परीने योगदान देत आहेत.

- तापसरंजन दास, अध्यक्ष, वृक्षसेवा संस्था