संग्रहित छायाचित्र
इस्लामाबाद : पाकिस्तानमध्ये तुरुंगात बंद असलेले माजी पंतप्रधान इम्रान खान यांच्या सुटकेसाठी त्यांच्या समर्थकांकडून जोरदार निदर्शने केली जात आहेत. तेहरिक-ए-इन्साफच्या (पीटीआय) आवाहनानंतर देशभरातून पक्ष समर्थकांचे ताफे शक्तिप्रदर्शन करत राजधानी इस्लामाबादकडे कूच करत आहेत. सरकारकडून मात्र पीटीआयच्या कार्यकर्त्यांना अटक केली जात आहे. याबरोबरच त्यांना इस्लामाबादकडे येण्यापासून रोखण्याकरिता अश्रुधूर तसेच बळाचा वापरदेखील करण्यात येत आहे.
इस्लामाबादकडे निघालेल्या पीटीआयच्या कार्यकर्त्यांना सरकारी यंत्रणांच्या जोरदार विरोधाला सामोरे जावे लागत आहे. पाकिस्तानमधील खैबर-पख्तूनख्वाचे मुख्यमंत्री अली अमीन गंडापूर आणि विरोधी पक्षनेते उमर अयुब यांच्या नेतृत्वाखालील पीटीआय समर्थकांचा मोठा ताफा पंजाबमार्गे स्वाबीहून इस्लामाबादला जात होता. या ताफ्यातील पीटीआय समर्थकांना पांगवण्यासाठी मोठ्या प्रमाणात अश्रुधुराच्या नळकांड्यांचा वापर करण्यात आला. अट्टोक ब्रिज, चाच इंटरचेंज आणि गाझी बरोथा कॅनॉल या भागात हा प्रकार घडला. स्वाब येथून निघालेल्या पीटीआय समर्थकांच्या ताफ्याचा प्रवास ते पंजाब प्रांतात प्रवेश करेपर्यंत सुरळीत सुरू होता. मात्र पुढे त्यांना सरकारी यंत्रणांच्या विरोधाला सामोरे जावे लागले. यावेळी गंडापूर यांनी पक्षाच्या समर्थकांना संबोधित केले. जोपर्यंत पीटीआयचे नेते इम्रान खान यांची सुटका होत नाही, तोपर्यंत आपला मोर्चा माघारी फिरवणार नसल्याचे गंडापूर यांनी यावेळी जाहीर केले. पुढे गाझी येथेही त्यांनी समर्थकांना संबोधित करताना पुढील प्रतिकारासाठी तयार राहण्याचे आवाहन केले.
राजधानीत आमरण लढा
पीटीआय समर्थकांचा ताफा गाझी पुलावर काही काळासाठी थांबवण्यात आला होता. यावेळी काही प्रमाणात पीटीआय पक्षाअंतर्गत मतभेद समोर आल्याचे पाहायला मिळाले. येथे गंडापूर यांनी पुढील संघर्षाच्या आधी कार्यकर्त्यांना काही वेळ आराम करण्याचा सल्ला दिला, तर दुसरीकडे इम्रान खान यांच्या पत्नी बुशरा बिबी यांनी मात्र होत असलेल्या उशिराबद्दल नाराजी व्यक्त करत विनाकारण वेळ वाया घालवला जात असल्याची तक्रार केली. तसेच जराही उशीर न करता ताफा पुढे घेऊन जाण्याची विनंती केली. पाकिस्तानचे माजी पंतप्रधान इम्रान खान यांच्या पीटीआय पक्षाकडून कार्यकर्त्यांना इस्लामाबाद येथे एकत्र येण्याचे आवाहन करण्यात आले आहे. यासाठी पीटीआयने इस्लामाबादच्या दिशेने मोर्चाचे आयोजन केले आहे. पक्षाकडून इस्लामाबाद शहरातील डी-चौकात आंदोलन केले जाणार आहे. हे आंदोलन स्वातंत्र्य आणि न्यायाची लढाई असल्याचे पीटीआयने म्हटले आहे. पक्षाने इम्रान खान यांना झालेल्या अटकेविरोधात आंदोलनाची भूमिका घेतल्याने देशात राजकीय तणाव वाढताना दिसत आहे. एकीकडे सरकारच्या विरोधानंतरही पीटीआयने कार्यकर्त्यांना इस्लामाबादमधील डी-चौकात येण्याचे आवाहन केले आहे, तर दुसरीकडे पाकिस्तान सरकारकडून या रॅलीचे आयोजन रोखण्यासाठी प्रयत्न केले जात आहेत. न्यायालयाच्या आदेशाचा हवाला देऊन इस्लामाबादमध्ये कोणत्याही आंदोलनास परवानगी दिली जाणार नसल्याचे सरकारने म्हटले आहे. तसेच गृह मंत्रालयाने कोणत्याही नियमांचे उल्लंघन केल्यास कायदेशीर कारवाई करण्याचा इशारा देखील दिला आहे.
आंदोलकांना रोखण्यासाठी सरकारची जोरदार तयारी
या घडामोडींदरम्यान पीटीआयचे नेते अमीर डोगर आणि झेन कुरेशी यांना पंजाब पोलिसांनी मुल्तान येथे अटक केली आहे. या दोन नेत्यांच्या अटकेनंतर तणाव आणखीच वाढला आहे. राजधानीकडे येणारे रस्ते बंद करून आंदोलनकर्त्यांना रोखण्याचे प्रयत्न सरकारकडून केले जात आहेत. या दरम्यान पीटीआयचे नेते मात्र आंदोलनावर ठाम आहेत. गंडापूर यांनी आपण रस्त्यातील अडथळे दूर करण्यासाठी खासगी यंत्रणा आणू असेही जाहीर केले आहे. तसेच त्यांनी कोणताही अडथळा आपल्याला डी-चौकात आंदोलन करण्यापासून रोखू शकणार नाही, असा निर्धारही व्यक्त केला आहे. दुसरीकडे सरकारकडून इस्लामाबादच्या बाहेर जोरदार नाकेबंदी करण्यात येत आहे. प्रमुख रस्ते बंद करत आणि शहरभर अडथळे उभारून या आंदोलनाला थोपवण्याची तयारी करण्यात आली आहे. तसेच मोठ्या संख्येने सुरक्षा दलांना शहरातील संवेदनशील भागात तैनात करण्यात आले आहे. प्रशासनाने डी-चौक, इस्लामाबाद विमानतळ अशा महत्त्वाच्या भागात जाणाऱ्या रस्त्यांवर नाकेबंदी केली आहे. शहरात येणाऱ्या रस्त्यांवर देखील कंटेनर्स ठेवून अडथळे निर्माण करण्यात आले आहेत. मात्र याचा सामान्य नागरिकांना त्रास सहन करावा लागत आहे. याबरोबरच पाकिस्तान सरकारने नफिसा खट्टक यांच्यासह अनेक पीटीआय कार्यकर्त्यांना ताब्यात घेतले आहे. लाहोर आणि पंजाबच्या इतर भागांमध्येदेखील काही जणांना अटक करण्यात आल्याचे वृत्त एक्सप्रेस ट्रिब्यूनने दिले आहे. इम्रान खान यांच्या समर्थकांकडून होत असलेल्या आंदोलनाच्या पार्श्वभूमीवर, संभाव्य परिस्थितीला तोंड देण्यासाठी, तसेच शहरातील महत्त्वाचे भाग सुरक्षित राहावेत यासाठी, संवेदनशील भागांमध्ये इंटरनेट आणि मोबाइल डेटा सेवा बंद केली जाऊ शकते, असे पाकिस्तानच्या गृह मंत्रालयाकडून सांगण्यात आले आहे.
