उर्वशीचा २४ कॅरेट सोन्याचा केक!

चित्रपटात तिला फारशा महत्त्वाच्या भूमिका मिळत नसल्या तरी उर्वशी तिच्या फॅशन सेन्ससाठी आणि बोल्ड लूकसाठी नेहमी चर्चेत असते. आता एका नव्या कारणामुळे उर्वशी चर्चेत आली असून रविवारच्या वाढदिवसानिमित्त उर्वशीने कापलेल्या केकची सध्या जोरदार चर्चा आहे. उर्वशी ३० वा वाढदिवस साजरा करीत असून त्यानिमित्त मध्यरात्री १२ वाजता तिने केक कापत वाढदिवस साजरा केला. यावेळी तिच्याबरोबर प्रसिद्ध रॅप सिंगर हनी सिंगही उपस्थित होता. पार्टीत सगळ्यांचे लक्ष वेधून घेतले ते उर्वशीच्या वाढदिवसाच्या केकने. उर्वशीने २४ कॅरेट सोन्याने बनविलेला केक कापला. या केकची किंमत लाखो रुपयांमध्ये असल्याचे सांगण्यात येते. उर्वशीने केक कापतानाचे फोटो इन्स्टाग्रामवर शेअर केले आहेत. फोटो शेअर करताना पार्टीस उपस्थित राहिल्याबद्दल हनी सिंगचे आभार मानले आहेत. यावेळी उर्वशीने लाल रंगाचा ड्रेस परिधान केला होता. तसेच गळ्यात मोत्यांचा हार घातला होता. हातात मोत्यांचे ब्रेसलेट होते. या लूकमध्ये उर्वशी खूप सुंदर दिसत होती. अनेक चाहत्यांनी या फोटोवर कमेंट्स करीत तिला वाढदिवसाच्या शुभेच्छा दिल्या आहेत.

उर्वशीने वाढदिवसाला इतका महागडा केक कापण्याची ही पहिलीच वेळ नाही. गेल्या वर्षीही तिने हिऱ्यांनी सजविलेला केक कापला होता. तसेच तिच्या वाढदिवसाच्या पार्टीत २४ कॅरेट सोन्याचे कप केकही होते. उर्वशीने वाढदिवसाच्या केकवर लाखो रुपये खर्च केल्यामुळे तिला ट्रोलही केले होते. एवढेच नाही, तर गेल्या वर्षी अहमदाबादमध्ये झालेल्या भारत-पाकिस्तान सामन्यादरम्यान उर्वशीचा २४ कॅरेट सोन्याचा आयफोन हरवला होता. उर्वशीने सोशल मीडियावर पोस्ट शेअर करीत ही माहिती दिली होती. तसेच हा फोन शोधून देणाऱ्या व्यक्तीस तिने बक्षीस देणार असल्याचेही जाहीर केले होते.