नदीतील जलपर्णीमध्ये तरुण अडकला
पुण्यातील कल्याणीनगर येथे पोहायला गेलेला २५ वर्षीय तरुण नदीच्या मधोमध जलपर्णीमध्ये अडकल्याची घटना घडली आहे. घटनेची माहिती मिळताच बी.टी.कवडे रोड आणि हडपसर अग्निशमन दलाचे जवान घटनास्थळी दाखल झाले. त्यानंतर तरुणाला पाण्यातून सुखरूप बाहेर काढण्यात आले आहे.
आज सकाळी ९ च्या सुमारास २५ वर्षीय तरुण कल्याणीनगर येथे पोहण्यासाठी गेला होता. मात्र, नदीमध्ये मोठ्या प्रमाणात जलपर्णी असल्याने तो जलपर्णीमध्ये अडकला. याबाबत अश्निशमन दल नियंत्रण कक्षात फोन आला होता. त्यानंतर घटनेचे प्रसंगावधान लक्षात घेऊन बी.टी.कवडे रोड आणि हडपसर अग्निशमन दलाचे जवान घटनास्थळी दाखल झाले.
घटनास्थळी पोहोचताच जवानांनी तत्परतेने नदीमधे रश्शी, लाईफ जॅकेट व लाईफ रिंगच्या साहाय्याने उतरून मधोमध अडकलेल्या तरुणाला सुखरूप बाहेर काढले. मात्र, यात तरुणाला काही प्रमाणात दुखापत झाली होती. त्यामुळे उपचारासाठी त्याला रुग्णालयात दाखल करण्यात आले आहे.
