संग्रहित छायाचित्र
ओटावा: कॅनडाचे पंतप्रधान जस्टिन ट्रुडो यांच्या राजीनाम्याची जागतिक स्तरावर चर्चा सुरू आहे. जस्टिन ट्रुडो आपल्या पदाचा राजीनामा देण्याच्या तयारीत असून लवकरच पदभार सोडू शकतात असे म्हटले जात आहे. स्थानिक प्रसारमाध्यमांनी दिलेल्या माहितीनुसार, ट्रुडो सोमवारी (दि. ६) राजीनाम्याची घोषणा करू शकतात. पंतप्रधानपदासोबत जस्टिन ट्रुडो यांचे पक्षावरील वर्चस्वही संपले असून पक्षात नव्या नेतृत्वाची मागणी जोर धरत आहे.
लिबरल पार्टीतील अंतर्गत गोंधळ आणि बहुतांश पक्ष सदस्यांच्या दबावामुळे ट्रुडो यांनी हा निर्णय घेतल्याचे सांगितले जात आहे. कॅनडाचे पंतप्रधान जस्टिन ट्रुडो यांनी २०१५ मध्ये पहिल्यांदा निवडणूक जिंकून कॅनडाचे पंतप्रधानपद भूषवले. त्यानंतर २०१९ आणि २०२१ च्या निवडणुकांमध्येही त्यांनी लिबरल पार्टीला विजय मिळवून दिला. मात्र, सध्या परिस्थिती पूर्णपणे बदललेली दिसत आहे. ट्रुडो सध्या प्रमुख विरोधी पक्ष असलेल्या कंझर्व्हेटिव्ह पार्टीचे नेते पियरे पॉइलीवर यांच्या तुलनेत २० टक्क्यांनी पिछाडीवर आहेत. या घसरणीमुळे त्यांच्या नेतृत्वावर मोठे प्रश्नचिन्ह उभे राहिले आहे. कॅनडामध्ये बुधवारी (दि. ८) राष्ट्रीय कॉकस बैठक होणार आहे. या बैठकीआधीच ते राजीनामा जाहीर करतील. परंतु, त्यांच्या राजीनाम्याची वेळ निश्चित समजू शकलेली नाही. ट्रुडो ताबडतोब राजीनामा देतील की नवीन नेत्याची निवड होईपर्यंत पंतप्रधानपदी कायम राहतील हे देखील स्पष्ट नाही. जस्टिन ट्रुडो यांनी राजीनामा दिल्यास तिथे लवकरच निवडणुका घेण्याची मागणी होऊ शकते. पंतप्रधानांनी अर्थमंत्री डॉमिनिक लेब्लँक यांच्याशी चर्चा केली आहे. अंतरिम नेता आणि पंतप्रधानपद स्वीकारण्याबाबत त्यांच्याबरोबर चर्चा झाली आहे. काही दिवसांपूर्वी ट्रुडो यांनी अमेरिकेचे नवनिर्वाचित राष्ट्रपती डोनाल्ड ट्रम्प यांची भेट घेतली होती. या भेटीतून त्यांनी अमेरिकेशी असलेले संबंध सुधारण्याचा प्रयत्न केला होता. परंतु, डोनाल्ड ट्रम्प यांनी त्यांना खास प्रतिक्रिया दिली नाही.
जस्टिन ट्रुडो आता प्रभावहीन
लिबरल पार्टीच्या अनेक सदस्यांनी म्हटले आहे की, जस्टिन ट्रुडो यांच्या नेतृत्वाखाली पक्षाला आगामी निवडणुकांमध्ये विजय मिळवणे कठीण आहे. यामुळे पक्षातील नाराजी वाढत असून काही सदस्यांनी खुलेपणाने त्यांच्या विरोधात भूमिका घेतली आहे. काही काळापूर्वी ट्रुडो यांना पदावरून हटवण्यासाठी सिग्नेचर कॅम्पेनही राबवण्यात आले होते. या प्रक्रियेदरम्यान ट्रुडो यांना अनेक कठोर प्रश्नांचा सामना करावा लागला. त्यामुळे राजीनाम्याचा दबाव वाढत गेला आहे. यामुळे जस्टिन ट्रुडो लवकरच राजीनामा देतील, अशी शक्यता वर्तवली जात आहे. जस्टिन ट्रुडो यांनी राजीनामा दिल्यास, लिबरल पार्टीला नव्या नेत्याची निवड करावी लागेल. सध्या पक्षाची स्थिती कमकुवत झाली असून नव्या नेतृत्वाशिवाय पक्षाला आगामी निवडणुकांमध्ये यश मिळवणे कठीण होईल. जर ट्रुडोंनी राजीनामा दिला नाही, तर पक्षाला पराभवाचा सामना करावा लागू शकतो, असा अनेकांचा विश्वास आहे.
भविष्यात कंझर्व्हेटिव्ह पक्षाची सत्ता
जर ट्रुडो यांनी राजीनामा दिला, तर कंझर्व्हेटिव्ह पार्टीचे नेते पियरे पॉइलीवर यांना कॅनडाच्या आगामी निवडणुकांमध्ये मोठा फायदा होऊ शकतो. लिबरल पार्टीसाठी हा मोठा टप्पा ठरू शकतो, ज्यामध्ये त्या पक्षाला आपले संघटन मजबूत करावे लागेल आणि जनतेचा विश्वास पुन्हा मिळवावा लागेल. कॅनडाच्या राजकीय परिस्थितीत हा एक मोठा बदल ठरू शकतो. जस्टिन ट्रुडो यांच्या राजीनाम्यामुळे देशाच्या राजकारणात नवीन वळण येण्याची शक्यता आहे. लिबरल पार्टीला नव्या नेतृत्वाखाली आपले अस्तित्व टिकवण्यासाठी आणि कंझर्व्हेटिव्ह पक्षाला टक्कर देण्यासाठी प्रभावी रणनीती आखावी लागेल.
