‘कोण म्हणतं नाटकाला गर्दी होत नाही…?’
मराठी रंगभूमीवरील अत्यंत लोकप्रिय अभिनेते म्हणजे प्रशांत दामले. गेली अनेक वर्षे दर्जेदार नाटकांच्या माध्यमातून ते प्रेक्षकांना आनंद देत आहेत. त्यांच्या उत्स्फूर्त अभिनयाने प्रेक्षकांना भुरळ घातली आहे. सध्या प्रशांत दामले हे ‘नियम व अटी लागू’ हे नाटक रंगमंचावर साकारताना दिसत आहेत. नुकतीच या निमित्ताने त्यांनी एक पोस्ट केली आहे.
गौरी थिएटर निर्मित आणि प्रशांत दामले फॅन फाऊंडेशन प्रस्तुत ‘नियम व अटी लागू’ या नाटकाची सध्या सर्वत्र चर्चा आहे. सध्या इचलकरंजीमध्ये या नाटकाचे प्रयोग सुरू आहेत. नाटकाच्या निमित्ताने अभिनेते प्रशांत दामले यांनी एक पोस्ट शेअर केली आहे. त्यात त्यांनी एक फोटोही शेअर केला आहे. या फोटोत काही प्रेक्षक मंडळी ही नाटकाची तिकीट खरेदी करताना दिसत आहेत. या फोटोला प्रशांत दामले यांनी हटके कॅप्शन देऊन त्यांचे कौतुक केले आहे. “कोण म्हणतं नाटकाला गर्दी होत नाही... आणि ही गर्दी नाही, ही आहे ‘दाद’ दर्दी रसिकांची... ही आहे शिस्तप्रिय इचलकरंजीकरांनी लावलेली रांग – महाराष्ट्रभर तुफान चाललेल्या ‘नियम व अटी लागू’ या खुसखुशीत नाटकाच्या तिकिट बुकिंगसाठी...”, असे प्रशांत दामले यांनी म्हटले आहे.
दरम्यान ‘नियम व अटी लागू’ या नाटकाचे लेखन अभिनेता संकर्षण कऱ्हाडेने केले आहे, तर नाटकाचे दिग्दर्शन चंद्रकांत कुलकर्णी यांनी केले आहे. या नाटकात संकर्षण कऱ्हाडे, अमृता देशमुख आणि प्रसाद बर्वे हे कलाकार प्रमुख भूमिकेत आहेत.
