संग्रहित छायाचित्र
मलायका अरोरा आणि अर्जुन कपूर हे एकेकाळचे बाॅलिवूडमधील चर्चित कपल. काही महिन्यांपूर्वी त्यांचे ब्रेकअप झाले. मात्र, अद्यापही त्यांच्या ब्रेकअपचा विषय इंडस्ट्रीमध्ये चर्चेत असतो. शुक्रवारी एका कार्यक्रमासाठी दोघेही उपस्थित होते. यात ते समोरासमोर आले, मात्र दोघांनीही एकमेकांकडे बघणेदेखील टाळले. यावरून त्यांच्यामध्ये इतक्या टोकाचा दुरावा का आला, याबाबत नव्याने चर्चा सुरू झाली आहे.
मलायका आणि अर्जुन शुक्रवारी (दि. २६) दोघेही नवी दिल्लीत आयोजित इंडियन कॉउचर वीकमध्ये उपस्थित होते. या कार्यक्रमाला दोघेही एकत्र पोहोचले नाहीत किंवा एकत्र दिसले नाहीत. पण ते अनेकदा समोरासमोर आले होते. कार्यक्रमात दोघेही समोरच्या सीटवर बसले होते. मात्र, दोघेही एकमेकांपासून लांब बसलेले दिसले. मलायका या कार्यक्रमात रॅम्प वॉक करत असताना अर्जुन फक्त हजेरी लावण्यासाठी आला होता.
इव्हेंटमधील दोघांचा एक व्हिडिओ व्हायरल झाला आहे ज्यामध्ये मलायका अर्जुनसमोरून गेली पण दोघांनीही एकमेकांकडे पाहिलेही नाही. यावेळी अर्जुनने मलायकाला समोरून जाण्याचा मार्ग दिला. अर्जुन जेव्हा त्याच्या चाहत्यांसोबत क्लिक करत होता तेव्हा मलायका मागून जाण्याचा प्रयत्न करत होती. अर्जुनने चाहत्यांना तिला रस्ता देण्यास सांगितले जेणेकरून ती आरामात जाऊ शकेल. यानंतर मलायका अर्जुनसमोरून गेली, पण दोघांनीही एकमेकांकडे पाहिलेही नाही. मलायकाने या कार्यक्रमात रॅम्प वॉक केला. विनोद खन्ना यांचा मुलगा राहुल खन्नासोबत ती डिझायनर सिद्धार्थ टायटलरची शो-स्टॉपर बनली. याआधी शुक्रवारी जेव्हा दोघेही मुंबई विमानतळावर स्पॉट झाले तेव्हा सर्वांना वाटले की ब्रेकअपनंतर त्यांच्यामध्ये सर्व काही ठीक होण्याच्या मार्गावर असावे. मात्र, या कार्यक्रमातून समोर आलेले हे व्हिडिओ पाहिल्यानंतर त्यांच्यातील टोकदार दुराव्याची चर्चा आता रंगली आहे.
अर्जुन आणि मलायका यांच्या विभक्त होण्याच्या बातम्या या वर्षी सुरू झाल्या जेव्हा दोघांनीही एकमेकांच्या वाढदिवसाला हजेरी लावली नाही किंवा सोशल मीडियावर एकमेकांना शुभेच्छाही दिल्या नाहीत. नंतर मात्र दोघांनीही आपल्या वाटा वेगळ्या झाल्याचे जाहीर केले.
