मुंबई, ठाण्यात शाळांना आज सुटी
#मुंबई
मुंबई आणि कोकणात मुसळधार पाऊस पडत असून ठिकठिकाणी रस्ते जलमय झाले आहेत. कोकणातील नद्या दुथडी भरून वाहात आहेत. दरम्यान, मुख्यमंत्री एकनाथ शिंदे यांनी राज्यातील पावसाचा आढावा घेतला असून शाळांना सुटी दिल्याचे जाहीर केले आहे. मुंबई, ठाणे पालघर, रायगडमध्ये गुरुवारी शाळांना सुटी दिल्याचे मुख्यमंत्री शिंदे यांनी सांगितले. हवामान विभागाने वरील चारही जिल्ह्यात गुरुवारी मुसळधार पाऊस पडण्याचा अंदाज व्यक्त केला आहे. या भागात यलो अलर्ट दिला आहे. मुख्यमंत्री शिंदे म्हणाले की, सर्व यंत्रणा सज्ज आहे. सरकारी यंत्रणा अलर्ट मोडवर आहे. मुंबई, ठाणे, पालघर आणि रायगड येथे शाळांना बुधवारीही सुटी देण्यात आलेली होती. कोकणात रात्रभर पावसाची शक्यता असून मुख्यमंत्र्यांनी रेल्वे स्थानकांसमोर एसटी बसची व्यवस्था करण्याच्या सूचना दिल्या आहेत.वृत्तसंस्था
