पुणे : पालकमंत्र्यांकडून शहरस्थितीचा आढावा

पावसामुळे रस्त्यावर पाणी साचून वाहतूक कोंडी होऊ नये, यासाठी आवश्यक उपाययोजना करण्याचे अजित पवारांनी दिले आदेश

पुणे शहरात पावसामुळे रस्त्यावर पाणी साचू नये, रस्त्यावर वाहतूक कोंडी होऊ नये म्हणून सर्व विभागांनी समन्वय ठेवून तातडीने उपाययोजना कराव्या तसेच नागरिकांना पावसात  कोणत्याही  प्रकारची अडचण होवू नये याची दक्षता बाळगावी, असे निर्देश पालकमंत्री तथा उपमुख्यमंत्री अजित पवार यांनी दिले.

विधानभवन येथे शुक्रवारी (दि. १४) झालेल्या या बैठकीस सहकार मंत्री दिलीप वळसे पाटील, आमदार दिलीप मोहिते पाटील, सिद्धार्थ शिरोळे, विभागीय आयुक्त डॉ. चंद्रकांत पुलकुंडवार, पोलीस आयुक्त अमितेश कुमार, पुणे महापालिका आयुक्त डॉ. राजेंद्र भोसले, पुणे जिल्हाधिकारी डॉ. सुहास दिवसे, पिंपरी-चिंचवडचे प्रभारी पोलीस आयुक्त सुनील रामानंद, पीएमआरडीए आयुक्त राहुल महिवाल आदी उपस्थित होते.

अजित पवार म्हणाले, ‘‘पुणे शहरात नुकत्याच झालेल्या मान्सूनपूर्व पावसामुळे बऱ्याच ठिकाणी रस्त्यावर पाणी साचून वाहतूक कोंडी झाली. या घटनांची पुनरावृत्ती होऊ नये यासाठी महापालिका, पोलीस विभाग, सार्वजनिक बांधकाम विभाग, पीएमआरडीए आदी विभागांनी समन्वय साधून नागरिकांना कोणत्याही प्रकारच्या समस्या येणार नाहीत याची दक्षता घ्यावी.’’

नियमबाह्य जाहिरात फलक लावणाऱ्यांवर कडक कारवाई करा...
आपत्तीच्या ठिकाणी महापालिकेने वेगाने प्रतिसाद द्यावा. शहर आणि परिसरातील धोकादायक जाहिरात फलक त्वरित काढावे. वाहतूकीस अडथळा निर्माण करणारे रस्त्यावरील अतिक्रमण काढावे. महापालिकेने नाल्यांची साफसफाई त्वरित करावी. जाहिरात फलकांचे सुरक्षा ॲडिट करावे. पुणे आणि पिंपरी-चिंचवड शहरातील धोकादायक जाहिरात फलक त्वरित काढावे, असे सांगून नियमबाह्य जाहिरात फलक लावणाऱ्यांविरोधात कडक कारवाई करावी, असे निर्देशही पालकमंत्र्यांनी बैठकीत दिले.

...तर हिंजवडीतील कोंडी फोडण्यासाठी अंदाजपत्रकात तरतूद
पावसामुळे आणि वाऱ्यामुळे रस्त्यावर झाड पडल्यास आधुनिक यंत्राचा वापर करून रस्ता वाहतुकीसाठी त्वरित मोकळा करावा.  कात्रज ते रावेत चौक पुलावर पाणी येऊ नये म्हणून राष्ट्रीय महामार्ग प्राधिकरणने उपाययोजना करावी. वारजे जंक्शनजवळील सेवा रस्ता रुंदीकरणासाठी आवश्यक कार्यवाही करावी. हिंजवडी आयटी पार्क परिसरातील वाहतूक कोंडी दूर करण्यासाठी कायमस्वरूपी नियोजन करावे. त्यासाठी आवश्यकता असल्यास अंदाजपत्रकात तरतूद करण्यात येईल, असेही पवार म्हणाले.

पुणे महापालिका आयुक्त डॉ. राजेंद्र भोसले म्हणाले, ‘‘पुणे शहरात साडे तीन हजार कचरावेचक कर्मचारी नियुक्त केले आहेत. शहरात पावसाचे पाणी साचणाऱ्या ठिकाणांची माहिती संकलित करण्यात आली आहे. या ठिकाणी पाणी साचू नये म्हणून कार्यवाही करण्यात येत आहे. चेंबर्स स्वच्छ करण्याची व्यवस्था करण्यात आली असून त्यावर जाळया टाकण्यात आल्या आहेत. 

वॉर्ड स्तरावर देखरेखीसाठी ४६ अधिकारी नियुक्त केले आहेत. प्रत्येक वार्डला अधिकचे १५ कर्मचारी नियुक्त केले आहेत.  नागरिकांकडून आलेल्या सूचनेनुसार उपाययोजना करण्यात आल्या आहेत. वार्डनिहाय अतिरिक्त निधी पुरविण्यात आला आहे.’’ शहरातील १ हजार ८०० अनधिकृत जाहिरात फलक काढण्यात आल्याची माहितीही त्यांनी दिली.