हाॅर्न वाजवणाऱ्या कारचालकाला बुलेटस्वाराने वाजवले
कारचालकाने हॉर्न वाजवल्याचा राग आला म्हणून पुण्यातील एका बुलेटस्वाराने त्याला जबर मारहाण केल्याचा प्रकार समोर आला आहे.
ही घटना खराडी बायपास येथे घडली असून या घटनेचा व्हीडीओ सोशल मीडियावर व्हायरल झाला आहे. या प्रकरणी पीडित तरुणाने पोलिसांत तक्रार दाखल केली आहे.
सुनील ओमप्रकाश राणा असं मारहाण झालेल्या तरुणाचं नाव असून तक्रारीनुसार राणा हे चिंबळी फाटा येथे कामानिमित्त कारने जात होते. जनक दर्गा परिसरात सिग्नल असल्यामुळे ते थांबले होते. कारसमोर पांढऱ्या रंगाची बुलेट गाडी होती. त्यावर एक तरुणी आणि एक तरुण बसला होता. ती गाडी सारखी मागेपुढे करत असल्यामुळे कारचालकाने हॉर्न वाजवला. बुलेटवर बसलेल्या तरुणीला त्याचा राग आल्याने तिने कारचालकाला शिवीगाळ केली.
त्यानंतर बुलेटस्वाराने चारचाकी गाडीचा आरसा काढला आणि कारचालकाला मारहाण केली. या मारहाणीमध्ये कारचालक जबर जखमी झाला असून त्याने याबद्दल पोलिसांत तक्रार दाखल केली आहे, पण हॉर्न वाजवल्याचा एवढा राग येऊन मारहाणीपर्यंत प्रकरण कसे जाऊ शकते, असा प्रश्न या घटनेच्या निमित्ताने निर्माण झाला आहे.
