संग्रहित छायाचित्र
चिंचवड विधानसभा मतदारसंघाची मतमोजणी थेरगाव येथील कामगार भवन येथे होणार आहे. भोसरी, पिंपरी मतदारसंघाची मतमोजणी बालेवाडी क्रीडा संकुलात तर, मावळ मतदारसंघाची मतमोजणी तळेगाव दाभाडे येथील नुतन विद्यालयात होणार आहे. या मतमोजणी निमित्त परिसरातील वाहतुकीत बदल करण्यात आला आहे. मतमोजणी निमित्त शनिवारी (दि. २३) वाकड, हिंजवडी आणि तळेगाव दाभाडे पोलीस ठाण्याच्या हद्दीतील वाहतुकीत बदल करण्यात आला आहे. याबाबतचे आदेश वाहतूक शाखेचे पोलीस उपायुक्त बापू बांगर यांनी दिले आहेत.
थेरगावातील वाहतुक बदल
वाकड वाहतुक विभागा अंतर्गत तापकीर चौक येथून थेरगावकडे जाणारी सर्व प्रकारची वाहने काळेवाडी रोडने काळेवाडी फाटा मार्गे इच्छित स्थळी जातील. काळेवाडी पोलीस स्टेशन येथून तापकीर चौकाकडे जाणारी वाहने पाण्याची टाकी मार्गे इच्छित स्थळी जातील. माध्यमीक विद्यालय थेरगाव समोरील चौकातून तापकीर चौकाकडे जाणारी सर्व प्रकारची वाहने माध्यमिक विद्यालय थेरगांव समोरील चौकातून उजवीकडे वळून ग प्रभागच्या रोडने इच्छित स्थळी जातील.
बालेवाडीतील वाहतुकीत बदल
हिंजवडी वाहतूक विभागा अंतर्गत गोदरेज सर्कल, म्हाळुंगे गाव ते राधा चौक व राधा चौक ते म्हाळुंगे गाव ते गोदरेज सर्कल या रस्त्यावरील जड व अवजड वाहने चांदे-नांदे येथून डावीकडे वळून माण व हिंजवडी मार्गे इच्छित स्थळी जातील. बाणेर रोड व राष्ट्रीय महामार्गावरुन येणारी जड अवजड वाहने राधा चौकातून उजवीकडे वळून वाकड नाका मार्गे हिंजवडी व इच्छित स्थळी जातील. बालेवाडी स्टेडीयम मेनगेट समोरील रस्त्यावर गोदरेज सर्कल व म्हाळूंगे गावातून येणारी - जाणारी हलकी वाहने उत्तम स्विट चौक येथून उजवीकडे वळून म्हाळुंगे पोलीस चौकीपासून पुढे मुख्य रस्त्याने राधा चौक येथून इच्छित स्थळी जातील.
तळेगावातील वाहतुकीत बदल
तळेगाव दाभाडे वाहतूक विभागा अंतर्गत मुंबईकडून तळेगाव - चाकण रोडने एचपी चौकाकडे जाणारी जड व अवजड वाहने वडगाव फाटा एमआयडीसी रोड मार्गे वडगाव कमान येथे डावीकडे वळून तळेगाव, नवलाख उंब्रे, बधलवाडी भामचंद्र डोंगर, आंबेठाण एचपी चौक मार्गे इच्छीत स्थळी जातील. मुंबईकडून चाकणच्या दिशेने जाणारी हलकी वाहने व दुचाकीस वडगाव फाटा निलया सोसायटी कार्नरकडून मंत्रा सिटी रोड मार्गे बीएसएनएल कॉर्नर, सीटी कार्नर, हिंदमाता भुयारी मार्ग येथे उजवीकडे वळून चाकण बाजुकडे जातील. चाकण एचपी चौकाकडून मुंबईच्या दिशेने जाणारी जड व अवजड वाहने एचपी चौक आंबेठाण, भामचंद्र डोंगर, नवलाख उंब्रे, तळेगाव एमआयडीसी मार्गे इच्छीत स्थळी जातील.
बधलवाडी चाकणकडून मुंबईच्या दिशेने जाणारी हलकी वाहने व दुचाकी जनसेवा वाचनालय इंद्रायणी कॉलेज येथून हिंदमाता भुयारी मार्ग, शांताई सीटी कार्नर, बीएसएनएल कॉर्नर, मंत्रासिटी रोड मार्गे इच्छीत स्थळी जातील.
