संग्रहित छायाचित्र
पिंपरी-चिंचवड : महाराष्ट्र राज्य सार्वत्रिक विधानसभा निवडणूक २०२४ ची घोषणा मंगळवारी (दि. १५) भारत निवडणूक आयोगाने केली आहे. त्यामुळे आदर्श आचारसंहिता लागू झाली असून या आदर्श आचार संहितेची सर्व प्रशासकीय यंत्रणांनी काटेकोरपणे अंमलबजावणी करावी, असे आदेश आयुक्त तथा प्रशासक शेखर सिंह यांनी दिले आहेत.
सार्वत्रिक विधानसभा निवडणूकीचा कार्यक्रम घोषित झाला आहे. निवडणूक आयोगामार्फत आदर्श आचारसंहितेच्या मार्गदर्शक सूचना देण्यात आल्या असून यामधील सूचनांचे पालन करून आदर्श आचारसंहितेचा भंग होणार नाही याची प्रत्येकाने दक्षता घ्यावी, असे देखील आयुक्त सिंह यांनी सांगितले. पिंपरी-चिंचवड महापालिकेच्या कार्यक्षेत्रात नियमबाह्य तसेच अनधिकृतपणे लावण्यात आलेले राजकीय फ्लेक्स, बॅनर, होर्डिंग्स, चिन्ह, ध्वज, फलक, भिंतीवरील राजकीय जाहिराती आदी तत्सम बाबी तात्काळ हटवण्यात याव्यात, असे आदेश आयुक्त शेखर सिंह यांनी महापालिका प्रशासनाला दिले.