संग्रहित छायाचित्र
मराठी कलाकार सोशल मीडियावर चांगलेच सक्रीय असतात. ते कायमच आपल्या आयुष्यातील गोष्टी चाहत्यांसोबत शेअर करत असतात. त्यांच्याबद्दल जाणून घेण्यास चाहतेही उत्सुक असतात. कलाकारांच्या आयुष्यातील आनंदाचे क्षण पाहण्यासाठी चाहते आतुर असतात. अशीच एक अभिनेत्री आहे जी लग्नानंतर तब्बल तीन वर्षांनी सासरी गेली आहे. आणि तिच्या सासूबाईंनी देखील तिचे अगदी प्रेमाने उत्साहात स्वागत केले आहे. अगदी तिच्यासाठी घर सजवले आहे. तिचे औक्षण केले आहे. तिच्यासाठी फुलांच्या पायघडया घातल्या आहेत. ही अभिनेत्री आहे 'बिग बॉस' फेम सई लोकूर. सई लग्नानंतर तीन वर्षांनी तिच्या सासरी पोहोचली आहे. आणि आता लग्नाच्या तीन वर्षानंतर तिचा सासरी खऱ्या अर्थाने गृहप्रवेश झाला आहे असे म्हणायला हरकत नाही.
तिने एक व्हीडीओ शेअर केला आहे जो सोशल मीडियावर चांगलाच व्हायरल झाला आहे. सईने 'बिग बॉस' मराठीमध्ये सगळ्यांची मने जिंकली होती. त्यानंतर तिने काही चित्रपटात काम केले आणि अभिनय क्षेत्रातून ब्रेक घेतला. तिने २०२० मध्ये तीर्थदीप रॉयसोबत लग्नगाठ बांधली. लग्नाच्या ३ वर्षांनंतर सईने डिसेंबर महिन्यात गोड मुलीला जन्म दिला. या संपूर्ण प्रवासात ती कायमच चाहत्यांसोबत जोडलेली राहिली. लग्नानंतर त्यांनी बंगळुरू येथे नवीन घर खरेदी केले होते. मात्र ती तिथे राहायला गेली नव्हती. आता अखेर ती तिच्या सासरी बंगळुरू येथे गेली आहे. याबद्दल तिने एक स्टोरी शेअर केली होती. आता तिथे पोहोचल्यावर सईच्या सासूबाईंनी तिचे मोठ्या प्रेमाने स्वागत केले आहे. या व्हीडीओमध्ये त्यांनी तिच्यासाठी ओलांडायला माप ठेवल्याचे दिसत आहे. संपूर्ण घरात अभिनेत्रीसाठी फुलांची सजावट करण्यात आली आहे. सासूबाई या सईचे औक्षण करत आहेत. त्यांनी एका ताटात दिवा आणि त्याच्या बाजूने गुलाबांची फुले लावली आहेत. या सगळ्यात सासूबाईंच्या चेहऱ्यावरचा आनंद अगदी पाहण्यासारखा आहे. या व्हीडीओवर चाहत्यांनी भरभरून प्रतिक्रिया दिल्या आहेत. त्या दोघींच्या नात्यावरही नेटकरी कमेंट करत आहेत. 'किती गोड', 'सुंदर घर', 'अभिनंदन डिअर' अशा अनेक प्रतिक्रिया चाहत्यांनी तिच्या व्हीडीओवर केल्या आहेत. या सासू-सुनेचे नाते पाहून नेटकरीही त्यांना 'नजर न लागो' अशा भावना व्यक्त करत आहेत.
