पुन्हा येतोय... शक्ती शक्ती शक्तिमान!

९० च्या दशकातील लहान मुलांचा लाडका सुपरहिरो 'शक्तिमान' पुन्हा एकदा पडद्यावर दिसणार आहे. अभिनेते मुकेश खन्ना यांनी ‘शक्तिमान’ या मालिकेच्या पुनरागमनाची घोषणा करत चाहत्यांना ही आनंदाची बातमी दिली आहे. त्यांनी त्यांच्या ‘भीष्म इंटरनॅशनल’ या यूट्यूब चॅनेलवर ‘शक्तिमान’चा एक टीझर शेअर केला आहे, ज्यामध्ये जुन्या मालिकेच्या काही खास क्षणांची झलक देखील पाहायला मिळते.

मुकेश खन्ना यांनी टीझरसोबत म्हटले आहे की, 'परतण्याची वेळ आली आहे.' यामुळे ९० च्या दशकातील मालिकेचे चाहते उत्सुकतेने शक्तिमानच्या पुनरागमनाची वाट पाहत आहेत. १९९७ ते २००५ दरम्यान प्रसारित झालेल्या या मालिकेने त्या काळातील लहान मुलांमध्ये खास स्थान निर्माण केले होते.

मुकेश खन्ना यांनी काही दिवसांपूर्वी सोशल मीडियावर मालिकेच्या चित्रीकरणाबद्दल पोस्ट केली होती, ज्यातून मालिकेचे चित्रीकरण पूर्ण झाल्याची माहिती मिळाली. परंतु, या नव्या मालिकेच्या प्रसारणाची निश्चित तारीख अद्याप जाहीर केलेली नाही.

टीझरमध्ये दाखवल्याप्रमाणे, अंधार आणि नकारात्मकतेचा मुकाबला करण्यासाठी शक्तिमान पुन्हा परत येणार आहे. 'शक्तिमान' हा मुलांना स्फूर्ती आणि सकारात्मकतेचा संदेश देणारा भारताचा सुपरहीरो आहे