संग्रहित छायाचित्र
ठाणे: राष्ट्रवादी (शरदचंद्र पवार) पक्षाचे नेते जितेंद्र आव्हाड यांच्यावर त्यांच्याच पक्षातील युवक जिल्हाध्यक्षाने गंभीर आरोप केले आहेत. विधानसभा निवडणुकीच्या तोंडावर हे आरोप केल्याने एकच खळबळ उडाली आहे. सुधीर पाटील हे राष्ट्रवादी काँग्रेस शरद पवार पक्षाचे ठाणे ग्रामीण युवक राष्ट्रवादीचे अध्यक्ष आहेत. त्यांनी पक्षाचे नेते आणि माजी मंत्री जितेंद्र आव्हाड यांचा उल्लेख ढोंगी असा केला आहे. शिवाय ते ॲक्टिंग करतात. त्यांनीच जिल्ह्याची वाट लावली असा खळबळजनक आरोप केला आहे.
सुधीर पाटील हे कल्याण पूर्व विधानसभा मतदारसंघातून निवडणूक लढण्यास इच्छुक होते. तशी तयारी त्यांनी केली होती. मात्र हा मतदारसंघ ठाकरे गटाला गेल्याने पाटील यांनी यासाठी आव्हाड यांना दोषी मानले आहे. शिवाय त्यांच्यावर गंभीर आरोप केले आहेत. आरोप केल्यानंतर त्यांनी पक्षाचा राजीनामाही दिला आहे. ते कल्याण पूर्व विधानसभा मतदारसंघातून अपक्ष निवडणूक लढणार आहेत. ठाणे जिल्ह्यात शाहू, फुले, आंबेडकर यांच्या विचारांच्या लोकांना न्याय मिळणार असे सांगितले जात होते. मात्र हे फक्त ढोंग होते. हे ढोंग जितेंद्र आव्हाड करत आहे. ते फक्त ॲक्टिंग करतात. त्यांनीच या जिल्ह्याची वाट लावली.
अशा माणसाच्या विरोधात बोलायचे नाही तर काय करायचे. त्यांना पाडण्यासाठी मी स्वत: जाणार आहे, असे वक्तव्य राष्ट्रवादी काँग्रेस शरद पवार गटाचे ठाणे जिल्हा ग्रामीण युवक जिल्हाध्यक्ष सुधीर पाटील यांनी केले आहे. कल्याण पूर्व विधानसभा मतदारसंघातून सुधीर पाटीलही इच्छुक होते. मात्र ही जागा ठाकरे गटाकडे गेली. त्यानंतर पक्षात जितेंद्र आव्हाड यांच्या विरोधात प्रचंड नाराजी आहे. महाविकास आघाडीला कल्याण डोंबिवलीतील चारही जागांवर मदत न करण्याचा निर्णय कार्यकर्त्यांनी घेतला असल्याचे पाटील यांनी स्पष्ट केले आहे.
कल्याण डोंबिवलीतील चार जागांपैकी कमीत कमी दोन जागा महाविकास आघाडीतील घटक पक्षांना मिळतील, अशी आशा होती. त्यातली एक जागा राष्ट्रवादी काँग्रेस (शरदचंद्र पवार) आणि एक जागा काँग्रेसला मिळेल असे कार्यकर्त्यांना वाटत होते. मात्र कल्याण डोंबिवलीतील चारही जागा ठाकरे गटाला गेल्या. कल्याण पूर्व विधानसभेसाठी काँग्रेसचे जिल्हाध्यक्ष सचिन पोटे आणि राष्ट्रवादी शरद पवार गटाचे सुधीर पाटील यांनी आपली संपूर्ण ताकद लावली होती. मात्र ही जागा ठाकरे गटाला गेली. शिवाय धनंजय बोडारे यांची उमेदवारीही जाहीर करण्यात आली.
ही माहिती समोर येताच, राष्ट्रवादी (शरदचंद्र पवार) काँग्रेसमध्ये अस्वस्थता पसरली आहे. ठाणे जिल्हा ग्रामीण युवक अध्यक्ष सुधीर पाटील यांनी तातडीने रात्री कार्यकर्ते आणि पदाधिकारी यांची बैठक आयोजित केली. या बैठकीत आमदार जितेंद्र आव्हाड यांच्या विरोधात प्रचंड नाराजी व्यक्त केली गेली. त्यांच्या विरोधात आक्षेपार्ह घोषणाबाजी करण्यात आली. सुधीर पाटील मंचावरून जितेंद्र आव्हाड यांच्याबद्दल खूप काही बोलून गेले. दरम्यान सुधीर पाटील यांनी आपल्या पदाचा राजीनामा दिला आहे. २९ तारखेला ते कल्याण पूर्व विधानसभा मतदारसंघातून अपक्ष म्हणून उमेदवारी अर्ज दाखल करणार आहेत. तशी त्यांनी घोषणा केली आहे. एवढेच नाही तर कल्याण डोंबिवलीतील चारही विधानसभा क्षेत्रात महाविकास आघाडीला मदत न करण्याचा निर्धारही केला आहे.
