'डार्लिंग' म्हणाल तर तुरुंगात जाल !
#कोलकाता
कोलकाता उच्च न्यायालयाने एक महत्त्वपूर्ण टिप्पणी केली आहे. जर एखाद्या व्यक्तीने एखाद्या अनोळखी महिलेला 'डार्लिंग' म्हटले तर त्याला लैंगिक छळासाठी दोषी मानले जाईल आणि भारतीय दंड संहितेच्या कलम ३५४ ए अंतर्गत त्याला तुरुंगात जावे लागेल. त्याचबरोबर त्याला दंडही भरावा लागेल. उच्च न्यायालयाच्या पोर्ट ब्लेअर खंडपीठाचे न्यायमूर्ती जय सेनगुप्ता म्हणाले की, आरोपी दारुच्या नशेत असला किंवा इतर कोणत्याही राज्यात असला तरीही त्याने एखाद्या अनोळखी महिलेला 'डार्लिंग' म्हटले, तर तो लैंगिक छळाचा दोषी मानला जाईल.
यासोबतच न्यायमूर्ती सेनगुप्ता यांनी अपीलकर्ता आरोपी जनक रामची शिक्षा कायम ठेवली, ज्याने मद्यधुंद अवस्थेत पकडल्यानंतर एका महिला पोलीस अधिकाऱ्याला (तक्रारदार) म्हटले होते की, "डार्लिंग, तू दंड आकारायला आली आहेस का?" न्यायमूर्ती सेनगुप्ता यांनी कलम ३५४ ए (महिलेच्या विनयभंगाचा) चा संदर्भ देत म्हटले की, आरोपीने महिला पोलिस अधिकाऱ्यावर केलेली टिप्पणी लैंगिक टिप्पणीच्या कक्षेत येते आणि या तरतुदीनुसार आरोपीला शिक्षा होईल. ते पुढे म्हणाले की, "रस्त्यावर असलेल्या एका अनोळखी महिलेला कोणताही पुरुष डार्लिंग असे संबोधू शकत नाही, जरी ती पोलिस हवालदार असली तरी."
न्यायमूर्ती सेनगुप्ता पुढे म्हणाले की, कोणतीही व्यक्ती, दारुच्या नशेत असो किंवा नसो, कोणत्याही अज्ञात महिलेला 'डार्लिंग' या शब्दाने संबोधू शकत नाही. जर त्याने तसे केले असेल तर ते स्पष्टपणे अपमानास्पद ठरेल आणि ती लैंगिक टिप्पणी ठरेल. तथापि, आरोपीने न्यायालयात दावा केला की, टिप्पणीच्या वेळी तो मद्यधुंद अवस्थेत होता याचा कोणताही पुरावा नाही. त्यावर उच्च न्यायालयाने म्हटले की, 'आरोपीने नशेत असताना महिला अधिकाऱ्याबाबत हे भाष्य केले असेल, तर गुन्हा अधिक गंभीर होतो.' न्यायमूर्ती सेनगुप्ता म्हणाले की, आपला समाज रस्त्यावर चालत असताना कोणत्याही अनोळखी महिलेला डार्लिंग म्हणण्याची परवानगी देत नाही. लैंगिक छळाच्या प्रकरणात दोषीला पाच वर्षांपर्यंत तुरुंगवास किंवा दंड किंवा दोन्हीही होऊ शकतात. वृत्तसंस्था
नेमके प्रकरण काय ?
न्यायालयात देण्यात आलेल्या माहितीनुसार, दुर्गापूजेच्या पूर्वसंध्येला फिर्यादी महिला कॉन्स्टेबल आणि अन्य कर्मचारी लाल टीकरी परिसरात कायदा व सुव्यवस्था राखण्याच्या कर्तव्यावर होते. जेंव्हा हे सर्व वेबी जंक्शन परिसरात पोहचले त्यावेळी त्यांना एक व्यक्ती दारू पिऊन गोंधळ घालत असल्याचे सांगण्यात आले. त्याला अटक करून जंक्शन परिसरातील स्ट्रीट लाईटखाली आणण्यात आले. त्यावेळी जनक राम याने, डार्लिंग, तू चलन काढायला आली आहेस का? अशा शब्दांत विचारणा केली, महिला कॉन्स्टेबलला ती अश्लील वाटली. त्यावर त्यांनी मायाबंदर पोलिस ठाण्यात भारतीय दंडसंहितेच्या सेक्शन ३५४ ए आणि ५०९ अनुसार एफआयआर दाखल केली.
