संग्रहित छायाचित्र
स्वातंत्र्य दिनाच्या खास मुहूर्तावर बॉलिवूडचे तीन मोठे चित्रपट प्रदर्शित झाले. मात्र अक्षयकुमारचा चित्रपट 'खेल खेल में' आणि जॉन अब्राहमचा चित्रपट 'वेदा' यांनी राजकुमार राव आणि श्रद्धा कपूरच्या ‘स्त्री-२’ चित्रपटासमोर गुडघे टेकले. अक्षय आणि जॉनचे चित्रपट बॉक्स ऑफिसवर ‘स्त्री-२’समोर फेल ठरले आहेत.
अमर कौशिक दिग्दर्शित ‘स्त्री-२’ या चित्रपटाने आठवड्याच्या शेवटी शानदार प्रदर्शन केले आणि रविवारपर्यंत बॉक्स ऑफिसवर २००.८ कोटी रुपयांची कमाई केली आहे. त्याचवेळी अक्षय कुमारच्या 'खेल खेल में' या चित्रपटाने १३.९५ कोटी रुपयांची कमाई केली आहे. तर, जॉन अब्राहमच्या 'वेदा' चित्रपटाने १३.२५ कोटींची कमाई केली आहे.
राजकुमार राव आणि श्रद्धा कपूर यांचा ‘स्त्री-२’ हा चित्रपट प्रेक्षकांच्या मनावर राज्य करत आहे. बॉक्स ऑफिसवर ७६.५ कोटींची कमाई करणाऱ्या या चित्रपटाने वीकेंडमध्येही शानदार कामगिरी केली. सकनिल्कच्या रिपोर्टनुसार ‘स्त्री-२ सरकटे का आतंक’ चित्रपटाची एकूण कमाई अवघ्या चार दिवसांत २००.८ कोटी रुपयांच्या जवळ पोहोचली आहे.
अक्षय कुमारचे स्टार्स बऱ्याच दिवसांपासून घसरत आहेत. त्याच्या 'खेल खेल में' या चित्रपटाने पुन्हा एकदा प्रेक्षकांची निराशा केली आहे. अक्षय कुमार व्यतिरिक्त या चित्रपटात तापसी पन्नू, वाणी कपूर, फरदीन खान, एमी विर्क, प्रज्ञा जयस्वाल आणि आदित्य सील यांच्या भूमिका आहेत. असे असूनही हा चित्रपट बॉक्स ऑफिसवर यशस्वी होताना दिसत नाही. या चित्रपटाने पहिल्या दिवशी ५.०५ कोटींची कमाई केली. चित्रपटाने दुसऱ्या दिवशी २.०५ कोटी रुपये आणि तिसऱ्या दिवशी ३.१ कोटी रुपयांची कमाई केली. चौथ्या दिवशी म्हणजेच रविवारी चित्रपटाने ३.७५ कोटींची कमाई केली. आत्तापर्यंत या चित्रपटाचे बॉक्स ऑफिसवर १३.९५ कोटी रुपयांचे कलेक्शन झाले आहे.
जॉन अब्राहम आणि शर्वरी वाघ यांचा निखिल अडवाणी दिग्दर्शित 'वेदा' हा चित्रपटही बॉक्स ऑफिसवर अपयशी ठरला. पहिल्या दिवशी या चित्रपटाचे बॉक्स ऑफिस कलेक्शन ६.३ कोटी रुपये होते. दुसऱ्या दिवशी १.८ कोटी आणि तिसऱ्या दिवशी २.४५ कोटींची कमाई केली. चौथा दिवस रविवार असूनही चित्रपटाचे कलेक्शन केवळ २.७ कोटी इतकेच राहिले. आतापर्यंत या चित्रपटाचे बॉक्स ऑफिस कलेक्शन १३.२५ कोटी रुपये झाले आहे.