अभिनेत्री कंगना रनोटच्या ‘इमर्जन्सी’ला सेन्साॅरची कात्री

हिमाचल प्रदेशची खासदार आणि अभिनेत्री कंगना रनोटच्या चित्रपट ‘इमर्जन्सी’ला सेंट्रल बोर्ड ऑफ फिल्म सर्टिफिकेशनने यू/ए प्रमाणपत्र दिले आहे. सीबीएफसीने या चित्रपटाच्या अनेक दृश्यांवर आक्षेप घेतला आहे, त्यामुळे आता हा चित्रपट अनेक कट आणि बदलांनंतर काही आठवड्यात प्रदर्शित होणार आहे.

सीबीएफसीने या चित्रपटातील तीन दृश्ये हटवण्याच्या सूचना दिल्या आहेत. चित्रपट प्रदर्शित करण्यापूर्वी त्यात तब्बल १० बदल करावे लागतील, अशा कडक सूचना देण्यात आल्या आहेत. या चित्रपटाबाबत शीख संघटनांनी आक्षेप घेतला होता, त्यामुळे सीबीएफसीने प्रमाणपत्र रोखून धरले होते. कंगनाने सांगितले होते की, प्रमाणपत्र न मिळाल्यामुळे हा चित्रपट नियोजित वेळेवर प्रदर्शित होऊ शकला नाही.

सेन्सॉर बोर्डाकडून प्रमाणपत्र मिळाल्यानंतर अद्यापपर्यंत शीख संघटना किंवा कंगनाकडून कोणतीही प्रतिक्रिया आलेली नाही. सेन्सॉर बोर्डाने आणीबाणीच्या काळात दाखवलेल्या वादग्रस्त विधानांवर तथ्य दाखवण्यास सांगितले आहे. सेन्साॅर बोर्डाने म्हटले आहे की निर्मात्यांना अमेरिकेचे माजी राष्ट्राध्यक्ष रिचर्ड मिलहॉस निक्सन यांनी भारतीय महिलांबद्दल केलेल्या अपमानास्पद टिप्पणीचे स्रोत आणि ब्रिटनचे माजी पंतप्रधान विन्स्टन चर्चिल यांच्या विधानाचे स्रोत सादर करावे लागतील की भारतीय सशासारखे प्रजनन करतात.

सेन्सॉर बोर्डाने मणिकर्णिका फिल्म्स प्रायव्हेट लिमिटेडला १० बदलांची यादी पाठवली आहे. यातील बहुतांश दृश्ये अशी आहेत ज्यावर शीख संघटनांनी आक्षेप घेतला आहे. चित्रपटाच्या एका दृश्यात पाकिस्तानी सैनिक बांगलादेशी निर्वासितांवर हल्ला करताना दाखवले आहेत. यामध्ये ते लहान मुले आणि महिलांवर हल्ला करताना दाखवण्यात आले आहे. सीबीएफसीनेही या दृश्यावर आक्षेप व्यक्त केला आहे. बोर्डाने निर्मात्यांना चित्रपटातील हा सीन बदलण्यास किंवा तो पूर्णपणे हटवण्यास सांगितले आहे.

कंगनाने या चित्रपटाचा ट्रेलर तिच्या सोशल मीडिया अकाउंटवर शेअर केला होता, हा चित्रपट ६ सप्टेंबरला प्रदर्शित होणार होता. याला शीख संघटनांनी विरोध सुरू केला आहे. या चित्रपटात शीखांना दहशतवादी दाखवण्याचा प्रयत्न करण्यात आल्याचा आरोप शीख संघटनांनी केला आहे. मुंबईत 'इमर्जन्सी' विरोधात हजारो शीखांनी निदर्शने केली. यात  वृद्ध, महिला आणि लहान मुलेही सहभागी झाली होती. 

गुरुद्वाराबाहेर हजारो शीख जमा झाले आणि त्यांनी घोषणाबाजी केली. त्यांनी कंगना रनोटच्या पोस्टरवर चप्पल मारली आणि चित्रपटाविरोधात नाराजी व्यक्त केली. मुंबईतील चित्रपटगृहात कोणत्याही परिस्थितीत हा चित्रपट प्रदर्शित होऊ देणार नसल्याचे शीख समुदायाच्या लोकांनी सांगितले. प्रशासनाने त्यांच्या मागण्यांकडे लक्ष न दिल्यास मोठ्या प्रमाणावर आंदोलन करू, असा दावा त्यांनी केला.

 जर्नेलसिंग भिंद्रनवाला ही व्यक्तिरेखा चित्रपटात दाखवण्यात आली आहे. जर्नेलसिंग भिंद्रेनवाला याला संपवण्यासाठी सुरू करण्यात आलेल्या ब्लू स्टार ऑपरेशनचेही चित्रीकरण या चित्रपटात करण्यात आल्याचे शीख संघटनांचे मत आहे. हे प्रकरण न्यायालयात पोहोचले,  त्यावर मुंबई उच्च न्यायालयात सुनावणी सुरू आहे.

पुढील सुनावणी १८ सप्टेंबर रोजी होणार आहे. या प्रकरणी पूर्वी ४ सप्टेंबर रोजी सुनावणी झाली. त्यामध्ये मुंबई उच्च न्यायालयाने सेन्सॉर बोर्डाला चित्रपटाबाबतचे आक्षेप दूर करून १८ सप्टेंबरपर्यंत प्रमाणपत्र देण्याचे निर्देश दिले होते. feedback@civicmirror.in