संग्रहित छायाचित्र
दगडांनी मारहाण करून अज्ञातांनी तरुणाचा खून केला. ही घटना शुक्रवार (दि. ४) रात्री साडेअकराच्या सुमारास डीलक्स चौक, पिंपरी येथे घडली. सोमनाथ मारुती बनसोडे (रा. गांधीनगर, पिंपरी) असे खून झालेल्या तरुणाचे नाव आहे.
पोलिसांनी दिलेल्या माहितीनुसार, शुक्रवार रात्री साडेअकराच्या सुमारास पिंपरीतील डीलक्स चौक येथील गुप्ता पान शॉपशेजारी एक इसम जखमी अवस्थेत पडल्याचा कॉल नियंत्रण कक्षाला प्राप्त झाला. त्यानुसार, स्थानिक पोलिसांसह गुन्हे शाखेची पथके घटनास्थळी दाखल झाली.
परिसरात चौकशी करून पोलिसांनी सोमनाथ बनसोडे याची ओळख पटवली. पोलिसांनी बनसोडे याला नजीकच्या रुग्णालयात दाखल केले. मात्र, उपचारापूर्वीच त्याचा मृत्यू झाल्याचे डॉक्टरांनी जाहीर केले. मृताच्या अंगावर दगडाने मारहाण केल्याच्या खुणा आहेत.
दारूच्या नशेत अज्ञातांनी हा खून केल्याचा प्राथमिक अंदाज पोलिसांकडून वर्तवण्यात येत आहे. पिंपरी पोलीस तपास करीत आहेत.
