संग्रहित छायाचित्र
सहा जणांच्या टोळक्याने एका रिक्षाचालकाला बेदम मारहाण केली. रिक्षा चालकाच्या डोक्यात कोयत्याने वार करत त्यास गंभीर जखमी केले. ही घटना शनिवारी (दि. ५) सकाळी सव्वासात वाजताच्या सुमारास खालुम्ब्रे येथील हुंडाई चौक रिक्षा स्टॉपवर घडली.
अतुल बाळासाहेब चौधरी (वय २६, रा. खालुम्ब्रे, ता. खेड) असे जखमी रिक्षाचालकाचे नाव आहे. त्यांनी याप्रकरणी महाळुंगे एमआयडीसी पोलीस ठाण्यात फिर्याद दिली आहे. त्यानुसार चेतन रणजीत इंगळे (वय २०), सुरज शरद जाधव (वय २०), युवराज जाधव, शरद अंकुश जाधव (वय ४२) आणि दोन महिला (सर्व रा. शिंदे वस्ती, सुदवडी, ता. मावळ) यांच्या विरोधात गुन्हा दाखल करण्यात आला आहे.पोलिसांनी चेतन इंगळे, सुरज जाधव आणि शरद जाधव या तिघांना अटक केली आहे. पोलिसांनी दिलेल्या माहितीनुसार, फिर्यादी चौधरी हे खालुम्ब्रे येथील हुंडाई चौक येथील रिक्षा स्टॉपवर भाडेकरूची वाट पाहत थांबले होते. त्यावेळी चेतन इंगळे तिथे आला. त्याने चौधरी यांना तुला लय माज आला आहे का. तुझ्याकडे बघतो, अशी धमकी दिली आणि निघून गेला. त्यानंतर चौधरी हे भाडे सोडण्यासाठी एचपी चौक येथे गेले. प्रवाशांना सोडून ते पुन्हा हुंडाई चौकातील रिक्षा स्टॉपवर आले. तिथे आरोपी जमले होते. त्यांनी चौधरी यांना मारहाण केली.
आरोपी युवराज जाधव याने चौधरी यांच्या डोक्यात कोयत्याने वार केले. भांडण सोडवण्यासाठी चौधरी यांची आई आली असता त्यांना देखील आरोपी महिलांनी मारहाण केली. महाळुंगे एमआयडीसी पोलीस तपास करीत आहेत.
