पुणे : ड्रेनेज विभागाच्या निविदांवर प्रश्नचिन्ह

सर्व निविदा १४ ते ३७ टक्के कमी दराने, कामाचा दर्जा खरंच राखला जाणार का, यावर रंगली चर्चा

पुणे महापालिका प्रशासनाकडून शहरातील विविध भागात ड्रेनेजलाईन टाकण्याचे काम केले जाते. येत्या काळात हे काम केले जाणार असून यासाठी मागविण्यात आलेल्या निविदा चक्क १४ ते ३७ टक्के कमी दराने भरण्यात आल्यामुळे कामाच्या दर्जाबाबत प्रश्नचिन्ह उपस्थित करण्यात येत आहे.

अर्थसंकल्पात केलेल्या तरतुदींनुसार पुणे महापालिकेने बावधन, हमालनगर, बिबवेवाडी, एकनाथनगर, राजेश सोसायटी ते पेशवे तलाव, शुक्रवार पेठ, भवानी पेठ, लोहियानगर आणि अलका टॉकीज चौक अशा ठिकाणी अपुऱ्या क्षमतेच्या ड्रेनेजलाईन बदलून नव्याने मोठ्या व्यासाच्या लाईन टाकण्याचे काम केले जाणार आहे. या कामासाठी निविदा मागविण्यात आल्या आहेत. मात्र, आश्चर्यकारक बाब म्हणजे यातील अनेक निविदा १४ ते ३७.११ टक्क्यांपर्यंत कमी दराने आल्या आहेत. कोट्यवधी रुपयांच्या या कामांच्या निविदा सुमारे ३० टक्के इतक्या कमी दराने आल्या आहेत. त्यामुळे ड्रेनेज लाईनच्या कामांचा दर्जा कसा राखला जाणार, असा प्रश्न पुणेकरांकडून उपस्थित केला जात आहे. तसेच कमी दराने आलेल्या निविदांना महापालिकेची स्थायी समिती मान्यता देणार का, याकडे पुणेकरांचे लक्ष लागले आहे.

ड्रेनेजलाईनसह अन्य कामांच्या निविदा कमी दरात भरण्याचा ट्रेंड यंदाही कायम आहे. गतवर्षीप्रमाणे यंदाही सरासरी १५ टक्के कमी दराने निविदा आल्या आहेत. यामध्ये बावधन येथील पीव्हीपी आयटी कॉलेज ते हॉटेल मेरीगोल्डपर्यंत करावयाच्या ड्रेनेजलाईनच्या कामासाठी ६ कोटी ५५ लाख रुपयांची निविदा काढण्यात आली. परंतु, २०.२० टक्क्यांपेक्षा कमी दराने आलेल्या निविदा स्वीकृतीसाठी ठेवण्यात आल्या आहेत. हमालनगरमधील २९ लाख रुपयांच्या ड्रेनेजलाईनची निविदा सुमारे २७.९६ टक्के कमी दराने आली आहे.

बिबवेवाडी ओटा ते शिवशंकरनगर या २९ लाख ६० हजार रुपयांच्या निविदाही २७.९६ टक्के कमी दराने आल्या आहेत. अरणेश्वर ते पद्मावती ड्रेनेजलाईन टाकण्यासाठी ६ कोटी ८१ लाख रुपयांची निविदाही सुमारे १७.२१ टक्के कमी दराने आली आहे. याशिवाय एकनाथनगर (विभाग ३६) ची निविदा ३०.९९ टक्के कमी दराने, प्रभाग ३५ ची निविदा ३३.९९ टक्के कमी दराने आणि कर्वेनगर येथील प्रभाग ३१ ची निविदा ३०.९९ टक्के कमी दराने आली आहे.

यामध्ये सर्वात धक्कादायक बाब म्हणजे, राजेश सोसायटी ते पेशवे तलावापर्यंत ड्रेनेज लाइन टाकण्यासाठी १ कोटी ३ लाख रुपयांची निविदा सर्वात कमी ३७.११ टक्के दराने आली आहे. त्याचबरोबर शुक्रवार पेठ, भवानी पेठ आणि लोहियानगर येथील ड्रेनेज लाईनसाठी ८ कोटी ९३ लाख रुपयांची निविदा १७.२१ टक्के कमी दराने आली असून अलका टॉकीज चौक ते गांजवे या ८ कोटी १६ लाख रुपयांची निविदा काढण्यात आली आहे.

एकूणच ड्रेनेज विभागाने काढलेल्या सर्व निविदा कमी दराने आल्या आहेत. अशा स्थितीत ड्रेनेजलाईनच्या कामाचा दर्जा कायम राहणार का, असा प्रश्न नागरिक उपस्थित करत आहेत. या सर्व निविदा स्थायी समितीच्या मान्यतेसाठी ठेवण्यात आल्या आहेत. अशा स्थितीत या निविदा स्वीकारल्या जातात का, हे पाहणे उत्सुकतेचे ठरणार आहे.

रिंग करून निविदा?

महापालिकेचे आर्थिक वर्ष संपायला अवघे चार महिने उरले आहेत. अशा स्थितीत मलनि:सारण विभागाने काढलेल्या या सर्व निविदा कमी दराने आल्याने संशयाचे वातावरण निर्माण झाले आहे. यातील काही निविदा ३७ टक्क्यांपेक्षा कमी दराने आल्या आहेत. काही निविदा १४ टक्क्यांपेक्षा कमी दराने आल्या आहेत. १४ टक्के आणि ३० टक्के टेंडर्स कुठेही जुळत नाहीत. त्यामुळे रिंग करून निविदांचे वाटप झाले आहे का, असा प्रश्न उपस्थित होत आहे.

ड्रेनेजलाईनचे काम करताना दर्जेदार काम व्हावे यासाठी चेकलिस्ट तयार करण्यात आली आहे. त्यानुसार ड्रेनेज पाईप आणि चेंबरचे साहित्य तपासले जाणार आहे. चेंबर बनवताना गरम केलेल्या विटांचा वापर करावा, असे स्पष्ट आदेश आहेत. दर्जा सुधारण्यासाठी अनेक उपाययोजना करण्यात आल्या असून त्यांची अंमलबजावणी करण्याच्या स्पष्ट सूचना देण्यात आल्या आहेत.

 - दिनकर गोंजारी, प्रमुख, ड्रेनेज विभाग.