पुणे : डेक्कन येथील संभाजी महाराजांच्या पुतळ्यावर उभारणार मेघडंबरी

४७ लाख २७ हजार रुपयांच्या निविदेला स्थायी समितीची मान्यता

डेक्कन येथील धर्मवीर छत्रपती श्री संभाजी महाराज यांच्या पुतळ्यावर मेघडंबरी उभारण्याची मागणी करण्यात आली होती. त्या मागणीला यश आले असून महापालिकेकडून मेघडंबरी उभारण्यात येणार आहे.

याकामासाठी  ४७ लाख २७ हजार रुपयांचा निधी मंजूर केला असून या प्रस्तावाला स्थायी समितीच्या बैठकीत मान्यता देण्यात आली आहे. येथील स्मारक आणि गरवारे भुयारी मार्गाच्या परिसराचे सुशोभीकरणदेखील केले जाणार असल्याची माहिती प्रशासनाने दिली.

डेक्कन जिमखाना परिसरात असलेल्या धर्मवीर संभाजी महाराज यांच्या पुतळा उभारण्यात आला आहे. येथे विविध राजकीय पक्ष तसेच संघटनांकडून पुतळ्याला अभिवादन करण्यात येते. तसेच विविध उपक्रमांची राबविले जातात. संभाजी महाराज यांच्या पुतळ्याला भेट देत पुष्पहार अर्पण करण्यासाठी गर्दी होत असते. डेक्कन परिसरातील महाराजांच्या पूर्णाकृती पुतळ्यावर मेघडंबरी उभारण्यात यावी, तसेच येथील परिसराचे सुशोभीकरण केले जावे, अशी मागणी विश्व हिंदू मराठा संघाचे भूषण वरपे यांच्यासह राजकीय पक्षांसह इतर अनेक संघटनांनी महापालिकेकडे केली होती. तसेच सातत्याने पाठपुरावा देखिल करण्यात आला होता. याची दखल घेत महापालिका आयुक्त डॉ. राजेंद्र भोसले यांनी भवन विभागाचे मुख्य अभियंता युवराज देशमुख, कार्यकारी अभियंता वीरेंद्र केळकर व अन्य अधिकाऱ्यांसह प्रत्यक्ष जागेवर पाहाणी केली होती. यानंतर पालिकेच्या भवन विभागाने याबाबतचा प्रस्ताव तयार केला होता.

याअंतर्गत छत्रपती संभाजी महाराज यांच्या पुतळ्याच्या भोवती बांधकामामध्ये चौथरा उभारण्यात येणार आहे. त्यावर पॉलिस्टर रेझिनचा वापर करून आकर्षक मेघडंबरी उभारण्यात येणार आहे. तसेच अभिवादनासाठी येणाऱ्या नागरिकांना उभे राहता यावे, यासाठीदेखील नव्याने चौथरा तयार करण्यात येणार आहे. या चौथऱ्यापर्यंत पोहोचण्यासाठी पायऱ्या उभारल्या जातील. तसेच दगडी बांधकामामध्ये सुशोभीकरण केले जाईल. यासाठी भवन विभागामार्फत निविदा प्रक्रिया राबविण्यात आली.

पूर्वगणन रकमेपेक्षा साडेपाच टक्के कमी दराने आलेल्या सर्वांत कमी दराच्या निविदेला स्थायी समितीच्या बैठकीत मान्यता देण्यात आली. पालिका आयुक्तांच्या अध्यक्षतेखाली ही बैठक झाली. या कामात मेघडंबरीसह, जिने व चौथऱ्याच्या कामाचा समावेश आहे. कार्यादेश निघाल्यानंतर तीन महिन्यांत हे काम पूर्ण केले जाईल, असे कार्यकारी अभियंता वीरेंद्र केळकर यांनी सांगितले.

डेक्कन जिमखाना परिसरात असलेल्या धर्मवीर संभाजी महाराज यांच्या पुतळ्यापासून विविध उपक्रमांची सुरुवात होत असते. विविध राजकीय पक्षांचे नेते या भागात आल्यानंतर या ठिकाणी येऊन संभाजी महाराज यांच्या पुतळ्याला भेट देत पुष्पहार अर्पण करत असतात. संभाजी महाराजांच्या या पूर्णाकृती पुतळ्यापासूनच मराठा समाजाचे ‘एक मराठा, लाख मराठा’ हे आंदोलन सुरू झाले होते. अनेक मोर्चे, आंदोलनाची सुरुवात येथून होत असते. त्यामुळे या पुतळ्याच्या आजूबाजूच्या परिसरात सुशोभीकरण करावे, अशी मागणी गेल्या काही वर्षांपासून केली जात होती.