Pune : ही दोस्ती तुटायची नाही.. सीएसकेच्या सलामीवीरांची कौटुंबिक भेट, ऋतुराज गायकवाडच्या घरी डेव्हॉन कॉनवे

पुणे: क्रिकेटच्या मैदानात एकमेकांविरुद्ध लढत असले तरी मैत्रीचे हृदयस्पर्शी नाते जपण्याचे उदाहरण क्रिकेटपटू ऋतुराज गायकवाड आणि डेव्हॉन कॉनवे यांनी दाखवून दिले आहे. चेन्नई सुपर किंग्जचा(CSK) आपला सलामीचा जोडीदार ऋतुराज गायकवाड याच्या घरी डेव्हॉन कॉनवे याने भेट दिली.

ऋतुराज गायकवाडने  इंस्टाग्रामवर हा हृदयस्पर्शी क्षण शेअर केला आहे. या फोटोत ऋतुराजची पत्नी उत्कर्षाही आहे. बुधवारी दक्षिण आफ्रिका आणि न्यूझीलंड यांच्यात सामना होण्यापूर्वीच पिंपळे गुरव येथील ऋतुराजच्या घरी हा खास सोहळा रंगला होता. आशियाई क्रीडा स्पर्धेत भारताच्या  संघाला विजय मिळवून देणाऱ्या ऋतुराजने जूनमध्ये उत्कर्षासोबत विवाह केला होता. नवविवाहित दांपत्याच्या घरी डेव्हॉन कॉनवे आला होता. ऋतुराज आणि कॉनवे या जोडीने इंडियन प्रीमियर लीग (IPL) च्या एकाच मोसमात सलामीत खेळताना दुसऱ्या क्रमांकाच्या सर्वाधिक धावा करण्याचा विक्रम केला आहे. 2023 च्या हंगामात त्यांनी 49 धावा केल्या होत्या. त्यांच्या उत्कृष्ट कामगिरीने सीएसकेला मागील हंगामातील  पाचवी आयपीएल ट्रॉफी जिंकता आली. 

सध्या सुरू असलेल्या 2023 विश्वचषकात न्यूझीलंडचे प्रतिनिधित्व करणाऱ्या कॉनवे याने  सहा सामन्यांमध्ये एकूण 277 धावा केल्या आहेत. त्यात 55.40 च्या प्रभावी सरासरीने इंग्लंडविरुद्धच्या संस्मरणीय नाबाद 152 धावांचा समावेश आहे. अफगाणिस्तान, भारत आणि ऑस्ट्रेलियाविरुद्ध अनुक्रमे 20, 0 आणि 28 धावा केल्या.