Pak attack on Afghanistan: पाकिस्तानचा अफगाणिस्तानवर हवाई हल्ला; १५ ठार

पक्तिका प्रांतातील डोंगराळ भागातील गुप्त तालिबानच्या केंद्रांना केले लक्ष

इस्लामाबाद/काबूल : अफगाणिस्तानच्या हद्दीमध्ये प्रवेश करीत पाकिस्तानने मंगळवारी (दि. २४) रात्री उशिरा तालिबानच्या गुप्त ठिकाणांवर हल्ला केला. पाकिस्तानच्या सीमेला लागून असलेल्या अफगाणिस्तानच्या भागात हे हल्ले करण्यात आले. या हवाई हल्ल्यात १५ जण ठार झाले आहेत.

या हल्ल्यात पाकिस्तानी तालिबान म्हणजेच तहरीक-ए-तालिबान पाकिस्तान (टीटीपी) चे प्रशिक्षण केंद्र उद्ध्वस्त झाल्याचे वृत्त एजन्सी एपीने पाकिस्तानी अधिकाऱ्यांच्या हवाल्याने म्हटले आहे. अनेक दहशतवाद्यांचा खात्मा झाल्याचा दावा अधिकाऱ्यांनी केला आहे.

मात्र, पाकिस्तानी विमाने अफगाणिस्तानात किती अंतरापर्यंत गेली आणि त्यांनी हल्ले कसे केले हे स्पष्ट झालेले नाही. मार्चनंतर पाकिस्तानने दुसऱ्यांदा अफगाणिस्तानमध्ये हवाई हल्ला केला आहे.

बॉम्बहल्ल्यात महिला,मुलांसह नागरिकांना केले लक्ष्य
अफगाणिस्तानच्या संरक्षण मंत्रालयाने पाकिस्तानच्या हवाई हल्ल्याचा निषेध केला आहे. बॉम्बहल्ल्यात महिला आणि मुलांसह नागरिकांना लक्ष्य करण्यात आल्याचा आरोप काबुलने केला आहे. अफगाणिस्तानने याला आंतरराष्ट्रीय नियमांचे उल्लंघन म्हटले आहे. अफगाण संरक्षण मंत्रालयाने सोशल मीडिया प्लॅटफॉर्म एक्सवर पोस्ट करून आपली नाराजी व्यक्त केली. मंत्रालयाने लिहिले की अशी एकतर्फी पावले कोणत्याही समस्येवर उपाय नाहीत. अफगाणिस्तानने सांगितले की ते हवाई हल्ल्याला प्रत्युत्तर देईल.

तालिबानच्या पुनरागमनानंतर टीटीपी मजबूत
२०२१ मध्ये अफगाणिस्तानमध्ये तालिबानच्या पुनरागमनानंतर पाकिस्तानी तालिबान (टीटीपी) मजबूत झाला आहे. टीटीपीने नोव्हेंबर २०२२ मध्ये पाकिस्तानसोबत एकतर्फी युद्धविराम संपवला होता. यानंतर त्यांनी पाकिस्तानवर हल्ले आणखी तीव्र केले आहेत. गेल्या काही महिन्यांत टीटीपीने पाकिस्तानचे अनेक सैनिक आणि पोलिस मारले आहेत. पाकिस्तानचा आरोप आहे की पाकिस्तानी तालिबान अफगाणिस्तानच्या भूमीचा वापर करून तेथे दहशतवादी हल्ले करतात. मात्र, अफगाणिस्तानने पाकिस्तानचे हे आरोप फेटाळून लावले आहेत.