नीट प्रकरणात टेरर फंडिंगचा संशय, महाराष्ट्रातून एक जण ताब्यात

नवी दिल्ली: नीट पेपर लीक प्रकरणात टेरर फंडिंगचा संशय आहे. महाराष्ट्रातील नांदेडच्या दहशतवादविरोधी पथकाने (एटीएस) याप्रकरणी चार जणांविरुद्ध एफआयआर नोंदवला आहे. त्यापैकी एकाला रविवारी (दि. २३) रात्री लातूर येथून ताब्यात घेण्यात आले.

यापूर्वी रविवारी एटीएसने संजय तुकाराम जाधव आणि जलील उमरखान पठाण या दोन शिक्षकांना लातूर येथे ताब्यात घेऊन त्यांची बराच वेळ चौकशी केली होती. यानंतर त्यांना सोडून देण्यात आले. यापैकी जलीलला रात्री उशिरा पुन्हा ताब्यात घेण्यात आले.

एनईईटी परीक्षा रद्द करण्याच्या मागणीसाठी एनएसयूआय सदस्यांनी सोमवारी (दि. २४) दुपारी एक वाजता दिल्लीतील जंतरमंतर येथे निदर्शने केली. संसदेला घेराव घालण्याच्या प्रयत्नात आंदोलकांनी पोलिसांचा बॅरिकेड तोडण्याचाही प्रयत्न केला. परीक्षा रद्द करण्याची आणि शिक्षणमंत्री धर्मेंद्र प्रधान यांच्या राजीनाम्याची मागणी या आंदोलनात करण्यात आली. बॅरिकेडवरून उडी मारणाऱ्या आंदोलकांना सुरक्षा दलांनी ताब्यात घेतले आणि सध्या आंदोलन स्थगित झाले आहे.

सर्वोच्च न्यायालयाने सोमवारी नीट-यूजी  प्रकरणाचा तपास ईडीकडे सोपवण्याच्या मागणीवर कोणताही आदेश दिलेला नाही. न्यायमूर्ती एएस ओका आणि न्यायमूर्ती राजेश बिंदल यांच्या खंडपीठाने या प्रकरणाची पुढील सुनावणी ८ जुलैला व्हावी, असे सांगितले.  

शिवानी मिश्रासह १० तक्रारदारांच्या याचिकेवर १० जून रोजी सर्वोच्च न्यायालयात ही सुनावणी झाली. ॲडव्होकेट मॅथ्यूज नेदुमपारा यांनी परीक्षेतील अनियमिततेचा तपास ईडीकडे सोपवावा आणि मनी लाँडरिंग कायद्यांतर्गत दोषींवर कारवाई करावी, असे आवाहन केले होते.

कलम ३२ अन्वये सर्वोच्च न्यायालयात याचिकाही दाखल करण्यात आली होती

सोमवारी सर्वोच्च न्यायालयात आणखी एक याचिका दाखल करण्यात आली, जी कलम ३२ अंतर्गत रिट याचिका म्हणून दाखल करण्यात आली. वास्तविक, घटनात्मक अधिकारांचे उल्लंघन झाल्यास, कलम ३२ अंतर्गत रिट याचिका म्हणून तक्रार दाखल केली जाते.  

याचिकेत एनईईटी यूजी परीक्षेतील ओएमआर शीटमध्ये छेडछाड केल्याप्रकरणी एनटीएच्या भूमिकेचा तपास सीबीआय आणि ईडीकडे सोपवण्याची मागणी करण्यात आली होती. ही प्रकरणेही ८ जुलै रोजी सुनावणीसाठी ठेवण्यात आली आहेत.

दुसरीकडे, एनटीएमधील सुधारणांसाठी स्थापन करण्यात आलेल्या उच्चस्तरीय समितीची पहिली बैठक सोमवारी झाली. या समितीत सात सदस्य असून इस्रोचे प्रमुख के. राधाकृष्णन हे त्याचे प्रमुख आहेत.  टणा येथील नीट वादाचा तपास सीबाआय करत आहे. बिहारकडून अहवाल घेतल्यानंतर अटक केलेल्या लोकांना चौकशीसाठी दिल्लीत आणले जाऊ शकते.

सीबीआयने रविवारी (दि. २३) परीक्षेतील अनियमिततेबाबत शिक्षण मंत्रालयाच्या तक्रारीवरून पहिला एफआयआर नोंदवला होता. मंत्रालयाकडून मिळालेल्या काही संदर्भांच्या आधारे, अज्ञात लोकांविरुद्ध आयपीसीच्या कलम १२० ब (गुन्हेगारी कट) आणि ४२० (फसवणूक) यासह विविध कलमांखाली एफआयआर नोंदवण्यात आला.

सीबीआयने तपासासाठी दोन विशेष पथके तयार केली आहेत, जी पाटणा आणि गोध्रा येथे जाणार आहेत. केंद्र सरकारने २२ जूनच्या रात्री तपासाची जबाबदारी सीबीआयकडे सोपवली होती.

५ मे रोजी झालेल्या नीट परीक्षेच्या निकालात वाढीव गुण मिळालेल्या १,६५३ उमेदवारांसाठी रविवारी पुनर्परीक्षा घेण्यात आली. यात १,५६३ पैकी केवळ ८१३ उमेदवार परीक्षेला बसले होते. ७५० उमेदवार परीक्षेला बसले नाहीत. चंदीगडमध्ये फक्त दोन उमेदवारांसाठी परीक्षा केंद्र बनवण्यात आले होते, ते दोघेही आले नाहीत.

एनटीएची वेबसाइट हॅक झाल्याची अफवा

दुसरीकडे, एनटीए वेबसाइट हॅक झाल्याची अफवाही समोर आली आहे. यावर एका अधिकाऱ्याने सांगितले की, त्यांचे पोर्टल पूर्णपणे सुरक्षित आहे. एनटीएने २०0 जून रोजी पुनर्परीक्षेचे प्रवेशपत्र जारी केले होते. ३० जूनपर्यंत निकाल जाहीर होईल. सुधारित निकाल जाहीर झाल्यानंतर ६ जुलैपासून समुपदेशन सुरू होईल.