कोलकाता: आरजी कर हाॅस्पिटलचे माजी प्राचार्य संदीप घोष यांना शुक्रवारी (दि. २७) विशेष सीबीआय न्यायालयात हजर करण्यात आले. न्यायालयाने संदीपला जामीन देण्यास नकार दिला. संदीपवर लावण्यात आलेले आरोप गंभीर असल्याचे न्यायालयाने म्हटले आहे. हे सिद्ध झाल्यास घोषला फाशीची शिक्षा होऊ शकते.
सीबीआयने ९ ऑगस्ट रोजी संदीप घोष आणि ताला पोलीस ठाण्याचे माजी प्रभारी अभिजित मंडल यांना अटक केली होती. या दोघांवर पुराव्याशी छेडछाड केल्याचा आणि आरजी कर हॉस्पिटलमधील प्रशिक्षणार्थी डॉक्टरच्या बलात्कार-हत्याप्रकरणी एफआयआर नोंदवण्यास विलंब केल्याचा आरोप आहे. संदीप आणि अभिजीतला ३० सप्टेंबरपर्यंत न्यायालयीन कोठडी सुनावण्यात आली आहे.
पोलीस ठाण्यात चुकीच्या पद्धतीने कागदपत्रे तयार करण्यात आली होती कोलकात्याच्या आरजी कर मेडिकल कॉलेज आणि हॉस्पिटलमध्ये ९ ऑगस्ट रोजी प्रशिक्षणार्थी डॉक्टरच्या बलात्कार-हत्या प्रकरणाचा तपास करत असलेल्या सीबीआयने नवे खुलासे केले आहेत. एजन्सीने २५ सप्टेंबर रोजी सियालदह न्यायालयात दावा केला होता की, ताला पोलिस ठाण्यातील बलात्कार-हत्या प्रकरणाशी संबंधित काही कागदपत्रे चुकीच्या पद्धतीने तयार करण्यात आली आणि बदलण्यात आली.
मुख्य आरोपी संजय रॉयचे कपडे आणि सामान जप्त करण्यात पोलिसांनी दोन दिवस उशीर केल्याचे सीबीआयने म्हटले आहे. त्यांची वेळीच चौकशी झाली असती तर आरोपींविरुद्ध भक्कम पुरावे मिळू शकले असते. एजन्सीने पोलिस स्टेशनचे सीसीटीव्ही फुटेज सेंट्रल फॉरेन्सिक सायन्स लॅबोरेटरी तपासासाठी पाठवले आहेत.
संजय रॉय, वैद्यकीय महाविद्यालयाचे माजी प्राचार्य संदीप घोष आणि ताला पोलिस ठाण्याचे प्रभारी अभिजित मंडल यांच्यातील गुन्हेगारी कटाचा तपास आता सीबीआय करत आहे. वैद्यकीय महाविद्यालयातील आर्थिक गैरव्यवहारप्रकरणी संदीप घोष हे १६ ऑगस्टपासून न्यायालयीन कोठडीत होते. २ सप्टेंबर रोजी सीबीआयने त्यांना भ्रष्टाचाराच्या प्रकरणात अटक केली. त्याला १४ सप्टेंबर रोजी बलात्कार-हत्याप्रकरणी अटक करण्यात आली होती.
९ ऑगस्ट रोजी रुग्णालयाच्या सेमिनार हॉलमध्ये प्रशिक्षणार्थी डॉक्टरचा मृतदेह आढळून आला होता आरजी कर मेडिकल कॉलेज आणि हॉस्पिटलच्या सेमिनार हॉलमध्ये सकाळी प्रशिक्षणार्थी डॉक्टरचा मृतदेह आढळून आला होता. ८ ऑगस्टच्या रात्री ती रात्रीच्या शिफ्टमध्ये विश्रांतीसाठी तेथे गेली होती. १० ऑगस्ट रोजी पोलिसांनी सीसीटीव्ही फुटेजच्या आधारे नागरी स्वयंसेवक संजय रॉय याला अटक केली.
बलात्कार-हत्येच्या घटनेच्या तीन दिवसांनंतर, संदीप घोष यांनी १२ ऑगस्ट रोजी या घटनेची नैतिक जबाबदारी स्वीकारून प्राचार्य पदाचा राजीनामा दिला. मात्र, आरजी कर कॉलेजमधील भ्रष्टाचारप्रकरणी सीबीआयने त्यांना १६ऑगस्टला ताब्यात घेतले.
हत्येच्या दुसऱ्याच दिवशी घोष यांनी दिले घटनास्थळाच्या नूतनीकरणाचे आदेश
प्रशिक्षणार्थी डॉक्टरच्या बलात्कार-हत्येच्या दुसऱ्याच दिवशी संदीप घोष यांनी सेमिनार हॉलला लागून असलेल्या खोल्यांचे नूतनीकरण करण्याचे आदेश दिले होते, असे सीबीआयच्या तपासात ५ सप्टेंबर रोजी उघड झाले. १३ऑगस्ट रोजी सेमिनार हॉलजवळही तोडफोड सुरू झाली होती. सूत्रांनी दिलेल्या माहितीनुसार, सीबीआयला अशी कागदपत्रे मिळाली आहेत की संदीप घोष यांनी १० ऑगस्ट रोजी राज्य सार्वजनिक बांधकाम विभागाला सेमिनार हॉलच्या शेजारी असलेल्या खोलीचे आणि शौचालयाचे नूतनीकरण करण्यास सांगितले होते. या परवानगी पत्रावर घोष यांची स्वाक्षरीही आहे. पीडब्ल्यूडी कर्मचाऱ्यांनी सेमिनार हॉलला लागून असलेल्या खोलीचे नूतनीकरण सुरू केले होते. मात्र, या प्रकरणी महाविद्यालयीन विद्यार्थ्यांनी मोठ्या प्रमाणावर विरोध सुरू केल्याने तेथील नूतनीकरणाचे काम बंद पडले.
तपास अधिकाऱ्यांचे म्हणणे आहे की, नूतनीकरणाच्या पत्रावरून हे स्पष्ट झाले आहे की, घोष यांना हे काम पूर्ण करण्याची घाई होती, त्यामुळे हा दस्तऐवज बलात्कार-हत्या प्रकरण आणि आरजी कर कॉलेजमधील आर्थिक अनियमितता प्रकरण यांच्यातील दुवा जोडण्यास मदत करू शकतो.
