File Photo
बाहुबली फेम अभिनेत्री अनुष्का शेट्टीच्या 'घाटी' या चित्रपटाचा पहिले पोस्टर समोर आले आहे. हे पोस्टर रिलीज होताच जोरदार व्हायरल झाले. आपल्या अभिनयाने प्रेक्षकांची मने जिंकणारी अभिनेत्री अशी अनुष्काची ओळख असून तिच्या आगामी घाटी चित्रपटाच्या टीजरची दमदार लाँचिंग करण्यात आली आहे. या टीजरने प्रेक्षकांची मने जिंकली आहेत.
अनुष्का शेट्टी ही आपल्या दमदार आणि वास्तववादी अभिनयासाठी ओळखली जाते. तिच्या 'घाटी' या नव्या चित्रपटाची सर्वांना उत्सुकता लागली आहे. या चित्रपटाचा टीजर नुकताच रिलीज झाला आहे. दोन दिवसांत या टीजरला १० मिलीयन व्ह्यूज मिळाले आहेत. या चित्रपटासाठी चाहते मोठ्या प्रमाणात उत्सुक आहेत. हा चित्रपट तामिळ, तेलगू, कन्नड, हिंदी आणि मल्याळम या पाच भाषांमध्ये प्रदर्शित होणार आहे.
टीजरमध्ये अनुष्का शेट्टीची दमदार एंट्री आणि अभिनय दिसून येत आहे. प्रेक्षकांकडून तिच्या लुकचे देखील कौतुक होत आहे. अनुष्का शेट्टीच्या आगामी घाटी या चित्रपटाचे लेखन आणि दिग्दर्शन क्रिश जगरलामुडी यांनी केलं आहे, तर फर्स्ट फ्रेम एंटरटेनमेंट्स अंतर्गत राजीव रेड्डी आणि साई बाबू जगरलामुडी यांनी याची निर्मिती केली आहे. या चित्रपटाचे संगीत नागवेल्ली विद्या सागर यांनी दिले आहे.
अनुष्का शेट्टी दाक्षिणात्य चित्रपटसृष्टीतील सुपरस्टार म्हणून ओळखली जाते. बाहुबली चित्रपटातील तिच्या देवसेना या भूमिकेने तिला जगभर प्रसिद्धी मिळवून दिली. नुकताच 7 नोव्हेंबर रोजी तिने तिचा 43 वा वाढदिवस साजरा केला. अरुंधती, रुद्रमादेवी, लिंगा, निशब्दम यासारख्या अनेक चित्रपटांमधून तिने प्रेक्षकांचं मनोरंजन केलं. अनुष्का शेट्टीचा आज जगभरात मोठा चाहतावर्ग आहे.
