भाग्यश्रीचा साखरपुडा

मराठी आणि हिंदी इंडस्ट्रीमध्ये स्वतःचे वेगळे स्थान निर्माण करणारी अभिनेत्री भाग्यश्री लिमये आणि सोशल मीडिया इन्फ्लुएंसर, अभिनेता अंकुश बहुगुणा सध्या त्यांच्या व्हायरल फोटोमुळे चर्चेत आले आहेत. छान साडी, स्लीव्हलेस ब्लाऊज, केसात गजरा, हिरवा चुडा, नाकात नथ. गळ्यामध्ये लहासनाच पण सुंदर दिसणारा नेकलेस अशा वेषात भाग्यश्री आणि फिकट क्रीम कलरचा खादीचा कुर्ता पायजमा त्यावर जॅकेट अशा वेषातील अंकुश बहुगुणा असा फोटो पाहिल्यानंतर या दोघांचे चाहते आनंदाने वेडेपिसे झाले होते. त्यात भर पड़ली ती भाग्यश्रीने लिहिलेल्या इन्स्टाग्राम पोस्टसाठीच्या कॅप्शनची. तिने म्हटले आहे की,  'सब अरेंज्ड है.'

यावरून भाग्यश्री आणि अंकुशने गुपचूप साखरपुडा उरकला अशी चर्चा सुरू झाली.भाग्यश्रीने ५ ऑक्टोबर रोजी इंस्टाग्रामवर अंकुशसोबतचे फोटो शेअर केले. या फोटोंमध्ये भाग्यश्री साडीमध्ये आणि अंकुश कुर्त्यात दिसत आहेत. तिने या फोटोंना 'पारिवारिकसा सब कुछ' असे कॅप्शन दिले होते. नंतर भाग्यश्रीने हे कॅप्शन बदलून 'सब अरेंज्ड है' असे कॅप्शन दिले.  यामुळे हे दोघे लवकरच लग्न करणार असल्याच्या चर्चांना उधाण आले. सोशल मीडियावरील या फोटोमुळे अनेकांनी भाग्यश्री आणि अंकुशचे लग्न ठरले असे समजून प्रश्न विचारले.

काहींना हा कांद्यापोह्यांचा कार्यक्रम वाटला, तर काहींनी त्यांचा साखरपुडा झाल्याचे म्हटले.  रोहन जोशीने या पोस्टवर कॉमेंट करताना 'समजत नाहीये की अभिनंदन करू की नको' अशी प्रतिक्रिया दिली आहे.  युट्युबर अभिषेक कपूरने 'हम साथ साथ हैं' अशी प्रतिक्रिया दिली आहे. याचे उत्तर अंकुशनेच दिले आहे. त्याने या फोटोवर प्रतिक्रिया देताना म्हटले आहे की, 'शूट आहे, लवकरच काहीतरी गोड घेऊन येत आहोत'. 

भाग्यश्री आणि अंकुशने शेअर केलेले फोटो त्यांच्या आगामी शोच्या शूटिंगदरम्यान काढलेले आहेत. त्यांचा नवा शो 'फिल्टरकॉपी' चॅनेलवर येणार असून त्यासाठी त्यांनी हा लूक धारण केला होता. 'अरेंज्ड पॅच अप'मध्ये भाग्यश्री आणि अंकुश या दोघांची जोडी पाहायला मिळाली होती. यामध्ये पूर्वाश्रमीच्या प्रेयसी आणि प्रियकराचे लग्न ठरते आणि मग पुढे धमाल उडते असे दाखवण्यात आले आहे.

हे फोटोशूट या शोच्या सिक्वेलसाठी असावे असाही अंदाज वर्तवला जात आहे. अंकुश आणि भाग्यश्रीच्या नव्या शोचे नाव काय असेल? त्यांचा लूक कसा असेल? हे जाणून घेण्यासाठी चाहत्यांना थोडी वाट पाहावी लागेल. दरम्यान, भाग्यश्रीचा काही महिन्यांपूर्वी 'मुंज्या' हा सिनेमा प्रेक्षकांच्या भेटीस आला, ज्यामध्ये तिच्या अभिनयाचे बरेच कौतुक झाले होते. 

feedback@civicmirror.in