File Photo
आलिया भटने ६ नोव्हेंबर २०२२ रोजी मुलगी राहाला जन्म दिला. अलीकडेच आलियाने सांगितले की, तिच्या मुलीच्या जन्मापूर्वीच तिने ज्युनियर एनटीआरसोबत मुलीच्या नावावर चर्चा केली होती. चर्चेदरम्यान, ज्युनियर एनटीआरला राहा हे नाव इतकं आवडलं की, मुलगीच व्हावी म्हणून तो प्रार्थना करत होता.
अलीकडेच ज्युनियर एनटीआरने आलियाच्या ‘जिगरा’सह ‘देवरा’ या चित्रपटाचे प्रमोशन केले आहे. यावेळी करण जोहरने दोघांची मुलाखतही घेतली. मुलाखतीदरम्यान आलियाने सांगितले की, ‘‘हे प्रेम तेव्हापासून सुरू झाले जेव्हा तारक (ज्युनियर एनटीआर) हैदराबादमध्ये झालेल्या ब्रह्मास्त्र चित्रपटाच्या प्रेस मीटमध्ये भेटले.
मला आठवते की मी त्यावेळी गरोदर होते. तारक मला म्हणाले, कार्यक्रम होईल, पण मग तुला माझ्या घरी जेवायला यावं लागेल. त्या टेरेसवर खूप चांगली संध्याकाळ होती, आम्ही जेवण करत होतो आणि बोलत होतो. मला आठवते की जेव्हा मी भावी बाळासाठी नावाचा विचार केला तेव्हा ती पहिलीच वेळ होती.’’
आम्ही सर्वांसमोर याबद्दल बोलत होतो, मला आठवतं मी आणि रणबीर म्हणत होतो की जर मुलगा असेल तर हे नाव असेल... जर ती मुलगी असेल तर ते नाव असेल. त्या चर्चेत राहा या नावाची चर्चा झाली का, असा सवाल करणने यावेळी केला. यावर आलिया म्हणाली, होय आम्ही राहा या नावावर चर्चा केली. आम्ही काही नावे निवडली होती. यावर ज्युनियर एनटीआरने म्हटले आहे की, मी प्रार्थना करत होतो की हे नाव राहा असेच ठेवले जावे आणि शेवटी तसे झाले.
आलियाने ज्युनियर एनटीआरसोबत ‘आरआरआर’ चित्रपटात काम केले आहे. सध्या ती ‘जिगरा’ या आगामी चित्रपटाच्या प्रमोशनमध्ये व्यस्त आहे. हा चित्रपट ११ ऑक्टोबरला प्रदर्शित होणार असून यात वेदांग रैना मुख्य भूमिकेत आहे. ज्युनियर एनटीआरचा ‘देवरा’ हा चित्रपट २७ सप्टेंबरला प्रदर्शित होणार आहे.
