संग्रहित छायाचित्र
मराठी चित्रपटसृष्टीतील ९० चे दशक आपल्या सहजसुंदर अभिनयाने गाजवणाऱ्या अभिनेत्री म्हणजे किशोरी शहाणे. किशोरी यांच्या अभिनयाचा जितका चाहता वर्ग आहे तितकाच त्यांच्या सौंदर्याचाही चाहता वर्ग आहे. किशोरी शहाणे यांनी महाराष्ट्र भूषण अशोक सराफ यांच्याबरोबर बऱ्याच चित्रपटांमध्ये काम केले आहे. दोघांचं ‘माझा पती करोडपती’ चित्रपटातले ‘तुझी माझी जोडी जमली’ हे गाणे आजतागायत मराठी रसिक प्रेक्षकांच्या ओठी गुणगुणले जाते.
अशा या सुपरहिट जोडीची नुकतीच ग्रेट भेट झाली. याचे फोटो किशोरी शहाणे यांनी सोशल मीडियावर पोस्ट केले आहेत. सध्या किशोरी शहाणे ‘झी टीव्ही’वरील ‘कैसे मुझे तुम मिल गए’ या हिंदी मालिकेत काम करत आहेत. याच मालिकेच्या सेटच्या शेजारी ‘कलर्स मराठी’वरील आगामी मालिका ‘अशोक मा.मा’चे चित्रीकरण होत आहे. हे समजताच किशोरी शहाणे अशोक सराफ आणि निवेदिता सराफ यांना भेटण्यापासून स्वतःला रोखू शकल्या नाहीत. किशोरी शहाणे, हेमांगी कवीने अशोक सराफ आणि निवेदिता सराफ यांची लगेच जाऊन भेट घेतली. किशोरी शहाणे फोटो शेअर करत म्हणाल्या, “ग्रेट भेट…खूप छान वाटले. लाडके अशोक मामा आणि माझे आवडते सहकलाकार माझ्या ‘कैसे मुझे तुम मिल गयी’ या मालिकेच्या सेटच्या शेजारी चित्रीकरण करत आहेत, हे मला समजले. तेव्हा मी स्वतःला त्यांना भेटण्यापासून, त्यांच्याशी छान गप्पा मारण्यापासून आणि हसण्यापासून रोखू शकले नाही. दिग्गज अशोक सराफ आणि सुंदर अभिनेत्री निवेदिता सराफ हे ‘कलर्स मराठी’ वाहिनीवरील नवीन मालिका ‘अशोक मा.मा’चे चित्रीकरण करत होते.
मराठी चित्रपटसृष्टीच्या सुवर्णकाळाचा मी एक भाग होते, यासाठी मी स्वतःला खूप भाग्यवान समजते. किशोर शहाणेंच्या या पोस्टवर नेटकऱ्यांनी भरभरून प्रतिक्रिया दिल्या आहेत. एका नेटकऱ्याने लिहिले, किती मस्त माझे सगळे आवडते कलाकार एकाच फ्रेममध्ये आहेत तर दुसऱ्या नेटकऱ्याने लिहिले की, तुमच्या सुपरहिट गाण्यात तुम्ही दोघांनी जबरदस्त परफॉर्मन्स केला होता. तसेच तिसऱ्या नेटकऱ्याने लिहिले की, सर्वोत्कृष्ट त्रिकुट.
दरम्यान, ‘कलर्स मराठी’ वाहिनीवरील अशोक सराफ यांच्या नव्या मालिकेचे आतापर्यंत दमदार प्रोमो आले आहेत. पण अद्याप मालिका कधीपासून सुरू होणार, हे जाहीर करण्यात आलेले नाहीत. या मालिकेत अशोक सराफांसह अभिनेत्री नेहा शितोळे झळकणार आहे. या मालिकेत पाहायला मिळणाऱ्या आणखी बऱ्याच कलाकारांची नावे गुलदस्त्यात आहेत.
