संग्रहित छायाचित्र
गांजाविक्री करणाऱ्या व्यक्तीस अंमली पदार्थविरोधी पथक एकने भवानी पेठ येथून अटक केली. इसाक जैनुद्दीन शेख (वय ५३, रा. चमडी गल्ली, भवानी पेठ) असे अटक करण्यात आलेल्या आरोपीचे नाव आहे. समर्थ पोलीस ठाण्यात त्याच्या विरोधात गुन्हा दाखल करण्यात आला आहे. पोलिसांनी दिलेल्या माहितीनुसार,
२ ऑक्टोबरला भवानी पेठ येथील नवलखा बिल्डींगच्या समोर गुन्हे शाखेचे अंमली पदार्थ विरोधी पथक एकमधील अधिकारी आणि अंमलदार गस्त घालत होते. त्यावेळी त्यांना एक संशयास्पद व्यक्ती आढळून आला. या व्यक्तीच्या हातात एक नायलॉनची पिशवी होती. हा व्यक्ती कोणाची तरी वाट बघत होता. त्यानंतर पोलिसांनी या व्यक्तीला ताब्यात घेतले. त्याच्याकडे विचारपूस असता त्याचे नाव इसाक जैनुद्दीन शेख असल्याचे सांगितले.
शेख याच्याकडे असलेल्या नायलॉनच्या पिशवीची तपासणी केली असता १८ हजार १६० रुपयांचा ९०८ ग्रॅम गांजा, ११ हजार १५० रुपयांची रोख रक्कम असा २९ हजार ३१० रुपयांचा ऐवज तसेच १५ प्लास्टिकच्या पारदर्शक पिशव्या आढळून आल्या. हा ऐवज शेख याने बेकायदशीर रित्या विक्री करण्यासाठी बाळगला म्हणून त्याच्याविरुद्ध गुन्हा दाखल करण्यात आला.
ही कारवाई पोलीस उपायुक्त (गुन्हे) निखिल पिंगळे, सहायक पोलीस आयुक्त (गुन्हे शाखा एक) गणेश इंगळे यांच्या मार्गदर्शनाखाली गुन्हे शाखेचे अंमली पदार्थ विरोधी पथक एकमधील वरिष्ठ पोलीस निरीक्षक उल्हास कदम, सहायक पोलीस निरीक्षक राजकुमार केंद्रे, पोलीस उपनिरीक्षक दिगंबर कोकाटे, पोलीस अंमलदार ज्ञानेश्वर घोरपडे, विशाल दळवी, संदीप शिर्के, प्रवीण उत्तेकर, संदेश काकडे, दत्ताराम जाधव, विनायक साळवे, विपूल गायकवाड, नुतन वारे आणि योगेश मोहिते यांनी केली.