नवीन भावा, तू फक्त आंबाच खा
#मुंबई
मुंबई इंडियन्सचा स्फोटक फलंदाज टीम डेव्हिडने १९ व्या षटकात नवीन उल हकच्या गोलंदाजीवर चौफेर फटकेबाजी केली. डेव्हिडने चौकार-षटकार ठोकत या षटकात १९ धावा कुटल्या. मुंबईविरोधात झालेल्या सामन्यात नवीनने ४ षटकांत ३७ धावा दिल्या. नवीनच्या गोलंदाजीवर मुंबईच्या फलंदाजांनी चांगलीच धुलाई केली. मुंबई इंडियन्सचा या सामन्यात पाच धावांनी पराभव झाला. शेवटच्या षटकात मोहसिन खानने अप्रतिम गोलंदाजी करून लखनौला विजय मिळवून दिला. त्यानंतर टीव्ही अभिनेता अली गोनीने एक ट्वीट करून क्रीडाविश्वात खळबळ उडवून दिली. गोनीने केलेले ट्वीट सोशल मीडियावर तुफान व्हायरल झाले असून कोहलीच्या चाहत्यांनी यावर भन्नाट प्रतिक्रिया दिल्या आहेत.
गोनीने ट्वीट करत म्हटले की, मोहसिनने शेवटचे षटक जबरदस्त फेकले. नवीन भावा तू फक्त आंबा खा. अभिनेता अली गोनीचे हे ट्वीट इंटरनेटवर प्रचंड व्हायरल झाले आहे. चाहते या ट्वीटवर मजेशीर प्रतिक्रियांचा वर्षाव करत आहेत. मागील काही दिवसांपूर्वी नवीन उल हकने आंबा खात असल्याचा फोटो इन्स्टाग्रामवर पोस्ट केला होता. ज्यामुळे नवीनची सोशल मीडियावर खूप चर्चा रंगली होती. याशिवाय कोहली आणि नवीन उल हक यांच्यात झालेल्या वादविवादाचीही आयपीएलमध्ये खूप चर्चा रंगली.
विराट कोहली-गंभीर व नवीन उल हकचा वाद काय होता?
रॉयल चॅलेंजर्स बंगळुरू विरुद्ध लखनौ सुपर जाएंट्स या सामन्यात विराट कोहली व गौतम गंभीर आमने-सामने आले होते. नवीन उल हकने सुद्धा यावेळी कोहलीशी पंगा घेतला होता, ज्यावरून सोशल मीडियावर दोन्ही खेळाडू व संघाच्या चाहत्यांमध्येही वाद झाला होता. हे भांडण इतके टोकाला गेले होते की बीसीसीआयने सुद्धा या तिघांवर अनुक्रमे १०० व ५० टक्के फीचा दंड आकाराला होता. नंतर दोन्ही संघांच्या मालकांच्या मध्यस्थीने हा दंड खेळाडूंना भरावा लागला नाही. हा वाद इथेच थांबला नाही तर नंतर प्रत्येक वेळी नवीन व विराट सामन्याच्या वेळी काही ना काही पोस्ट करून एकमेकांशी भिडत होते. विराट कोहली मुंबई विरुद्ध सामन्यात एक धाव करून बाद झाल्यावर नवीनने आंब्याचा फोटो शेअर करून पुन्हा एकदा विराटला डिवचले होते.
