importance of all-rounders has largely been eliminated....
मुंबई | आयपीएलमध्ये गेल्या अनेक वर्षांपासून अष्टपैलू खेळाडू संघाला चॅम्पियन बनवण्यात महत्त्वाची भूमिका बजावत आहेत. गेल्या हंगामात केकेआरला विजेते बनवणारा सुनील नरेन (४८८ धावा, १७ विकेट्स) असो किंवा शेवटच्या दोन चेंडूत १० धावा काढून २०२३ मध्ये चेन्नईला पाचवा ट्रॉफी मिळवून देणारा रवींद्र जडेजा असो... अशा अनेक ऑलराउंडर्सनी ही स्पर्धा गाजवली आहे. यंदा मात्र अशा खेळाडूंची संख्या झपाट्याने कमी झाली आहे.
चालू हंगामात अष्टपैलू खेळाडूंचे महत्त्व मोठ्या प्रमाणात संपुष्टात आले आहे. गेल्या हंगामात शंभरपेक्षा जास्त धावा आणि दहापेक्षा जास्त विकेट घेणाऱ्या खेळाडूंची संख्या चालू हंगामापेक्षा चार पट जास्त होती. या हंगामात फक्त दोन खेळाडूंना हा आकडा गाठता आला आहे. यामध्ये केकेआरचा सुनील नरेन आणि मुंबई इंडियन्सचा कर्णधार हार्दिक पंड्या यांचा समावेश आहे. गेल्या हंगामात, आठ खेळाडूंनी १०० पेक्षा जास्त धावा केल्या आणि १० किंवा त्याहून अधिक विकेट्सही घेतल्या. गेल्या वर्षीचा चॅम्पियन कोलकाता संघातर्फे सुनील नरेन आणि आंद्रे रसेल या दोन खेळाडूंनी असा पराक्रम केला होता.
आयपीएलमध्ये अष्टपैलू खेळाडूंची भूमिका कमी होण्याचे सर्वात मोठे कारण म्हणजे इम्पॅक्ट प्लेअर नियम. या नियमानुसार, संघ ११ ऐवजी १२ खेळाडूंसह मैदानात प्रवेश करतात. गरजेनुसार, प्लेइंग इलेव्हनमधील कोणत्याही खेळाडूऐवजी कोणत्याही फलंदाजाला किंवा गोलंदाजाला मैदानात उतरवू शकते. म्हणूनच संघ अर्धवेळ गोलंदाज आणि फलंदाजांऐवजी नियमित फलंदाज किंवा गोलंदाज निवडण्यास प्राधान्य देतात.
संघांचे म्हणणे काय?
राजस्थान रॉयल्सचे मुख्य प्रशिक्षक राहुल द्रविड म्हणतात की या नियमाचा अष्टपैलू खेळाडूंच्या अस्तित्वावर परिणाम होतो. यापूर्वी, फक्त ११ खेळाडू असल्याने काही खेळाडूंना वेगवेगळ्या परिस्थितीत फलंदाजी किंवा गोलंदाजी करण्याची अधिक संधी मिळत असे. पण इम्पॅक्ट प्लेअर नियमाने त्यात काही प्रमाणात बदल केला आहे.
इम्पॅक्ट प्लेअर नियमामुळे तुम्हाला संघात संपूर्ण अष्टपैलू खेळाडूचा समावेश करता येतो. पण सामन्याच्या मध्यभागी संघ पूर्ण फलंदाज किंवा गोलंदाज जोडत असल्याने इतर अष्टपैलू खेळाडूंना खेळातून वगळण्यात येते, असे मुंबई इंडियन्सचे मुख्य प्रशिक्षक महेला जयवर्धने यांनी सांगितले.
