संग्रहित छायाचित्र....
नवी दिल्ली - आयसीसी आंतरराष्ट्रीय क्रिकेट परिषदेनं भारत आणि श्रीलंका येथे होणाऱ्या या वर्षीच्या महिला एकदिवसीय विश्वचषकाचे वेळापत्रक जाहीर केले आहे. या स्पर्धेची सुरुवात येत्या ३० सप्टेंबर रोजी बेंगळुरूच्या चिन्नास्वामी स्टेडियमवर होईल. स्पर्धेचा पहिला सामना भारत आणि श्रीलंका या दोन संघांमध्ये खेळवला जाईल. स्पर्धेतला बहुप्रतिक्षित भारत विरुद्ध पाकिस्तान हा सामना येत्या ५ ऑक्टोबर रोजी होणार आहे. हा सामना श्रीलंकेत आर. प्रेमदासा स्टेडियमवर दुपारी ३ वाजता सुरू होईल. हायब्रिड मॉडेल अंतर्गत कोलंबो हे तटस्थ स्थळ म्हणून ठेवण्यात आले आहे.
भारत-श्रीलंकेच्या पाच शहरांमध्ये स्पर्धेचे आयोजन....
आयसीसीने महिला एकदिवसीय विश्वचषकाच्या तारखा आणि ठिकाणे आधीच जाहीर केली होती, परंतु सोमवारी त्यांनी त्याचे वेळापत्रक देखील जाहीर केले. ही जागतिक स्पर्धा ३० सप्टेंबरपासून सुरू होईल, ज्याचा अंतिम सामना २ नोव्हेंबर रोजी खेळला जाईल. स्पर्धेचे सामने भारत आणि श्रीलंकेतील पाच शहरांमध्ये होतील, ज्यामध्ये बंगळुरूमधील एम चिन्नास्वामी, गुवाहाटीमधील एसीए स्टेडियम, इंदूरमधील होळकर स्टेडियम, विशाखापट्टणममधील एसीए-व्हीडीसीए स्टेडियम आणि कोलंबोमधील आर प्रेमदासा स्टेडियम यांचा समावेश आहे.
ही जागतिक स्पर्धा १२ वर्षांनंतर भारतात आयोजित केली जाणार आहे. पहिला उपांत्य सामना २९ ऑक्टोबर रोजी गुवाहाटी/कोलंबो येथे खेळला जाईल, तर दुसरा उपांत्य सामना ३० ऑक्टोबर रोजी बेंगळुरू येथे खेळला जाईल. अंतिम फेरीत पोहोचणाऱ्या दोन्ही संघांना तयारीसाठी दोन दिवसांचा वेळ मिळेल. अंतिम सामन्याची तारीख २ नोव्हेंबर निश्चित करण्यात आली आहे, जी अंतिम फेरीसाठी पात्र ठरलेल्या संघांनुसार कोलंबो किंवा बेंगळुरू येथे खेळवली जाईल.
आठ संघ होतील सहभागी...
या विश्वचषकात एकूण ८ संघ सहभागी होत आहेत आणि ही स्पर्धा राउंड-रॉबिन स्वरूपात खेळवली जाईल. याचा अर्थ असा की सर्व ८ संघ गट टप्प्यात एकदा एकमेकांसमोर येतील. आठ संघामध्ये भारत, ऑस्ट्रेलिया, इंग्लंड, दक्षिण आफ्रिका, न्यूझीलंड, श्रीलंका, बांगलादेश आणि पाकिस्तान यांचा समावेश आहे. ऑस्ट्रेलिया या स्पर्धेत गतविजेता म्हणून प्रवेश करेल. २०२२ मध्ये न्यूझीलंडमध्ये खेळल्या गेलेल्या शेवटच्या विश्वचषकाच्या अंतिम फेरीत त्यांनी इंग्लंडला पराभूत केले होते. ऑस्ट्रेलियाने सात वेळा विजेतेपद जिंकले आहे आणि ते स्पर्धेच्या इतिहासातील सर्वात यशस्वी संघ आहे. तर इंग्लंडने चार वेळा आणि न्यूझीलंडने एकदा विजेतेपद जिंकले आहे. भारतीय संघाने कधीही महिला एकदिवसीय विश्वचषक जिंकलेला नाही, परंतु निश्चितच २ वेळा उपविजेता ठरला आहे.
हायब्रिड मॉडेल अंतर्गत होणार स्पर्धा....
यावेळी भारत आणि श्रीलंका संयुक्तपणे विश्वचषक आयोजित करत आहेत. भारत यापूर्वी स्पर्धेचा एकमेव यजमान होता परंतु आता स्पर्धेचे सामने बंगळुरू, गुवाहाटी, इंदूर, विशाखापट्टणम आणि कोलंबो येथे खेळले जातील. दरम्यान, पाकिस्तान आयसीसी स्पर्धांसाठी भारतात येणार नसल्याने आणि या वर्षाच्या सुरुवातीला चॅम्पियन्स ट्रॉफीसाठी हायब्रिड मॉडेलला मान्यता मिळाल्यामुळे कोलंबोचा यामध्ये समावेश करण्यात आला आहे.
भारतीय संघाचे सामने
श्रीलंका आणि पाकिस्तानशी खेळल्यानंतर, भारतीय संघ ९ ऑक्टोबर रोजी दक्षिण आफ्रिका आणि १२ ऑक्टोबर रोजी विशाखापट्टणम येथे ऑस्ट्रेलियाशी सामना करेल. संघ १९ ऑक्टोबर रोजी इंदूरमध्ये इंग्लंडशी आणि त्यानंतर २३ ऑक्टोबर रोजी गुवाहाटीमध्ये न्यूझीलंडशी सामना करेल. २६ ऑक्टोबर रोजी एम चिन्नास्वामी स्टेडियमवर भारतीय संघ बांगलादेशशीही सामना करेल. रॉयल चॅलेंजर्स बंगळुरू (आरसीबी) च्या विजयी उत्सवादरम्यान झालेल्या चेंगराचेंगरीनंतर मैदानाने यजमानपद गमावल्याच्या अफवांना यामुळे पूर्णविराम मिळाला आहे.
भारताचे संपूर्ण वेळापत्रक
३० सप्टेंबर - भारत विरुद्ध श्रीलंका
५ ऑक्टोबर - भारत विरुद्ध पाकिस्तान
९ ऑक्टोबर - भारत विरुद्ध दक्षिण आफ्रिका
१२ ऑक्टोबर - भारत विरुद्ध ऑस्ट्रेलिया
१९ ऑक्टोबर - भारत विरुद्ध इंग्लंड
२३ ऑक्टोबर - भारत विरुद्ध न्यूझीलंड
२६ ऑक्टोबर - भारत विरुद्ध बांगलादेश
