रिंकूने पाच सिक्स मारलेल्या यशचे दमदार पुनरागमन
#मुंबई
कोलकाता नाईट रायडर्स संघाचा स्टार फलंदाज रिंकू सिंगने सलग पाच सिक्स मारत आपली वेगळी ओळख तयार केली आहे. ज्याच्या गोलंदाजीवर रिंकूने ही कामगिरी केली होती, त्या गुजरातच्या यश दयालने दमदार पुनरागमन केले आहे.
गुजरात टायटन्स संघाच्या तोंडचा विजय रिंकूने आपल्या दमदार बॅटींगच्या जोरावर हिसकावला होता. यश दयालने टाकलेल्या शेवटच्या ओव्हरमध्ये त्याने सलग सिक्सर मारत संघाला विजय मिळवून दिला होता. या आघातामुळे यश मानसिक ताणावात आला होता. सामन्यानंतर तो आजारी पडला होता. इतकंच नाहीतर त्याचं वजनही ८ ते ९ किलोने कमी झाल्याचं हार्दिक पंड्याने सांगितलं होतं. पण पठ्ठ्याने हार मानली नाही. हैदराबादविरूद्धच्या सामन्यामध्ये यशने जोरदार कमबॅक केलं. यशने दुसऱ्या षटकाच्या चौथ्या चेंडूवर हैदराबादचा सलामीवीर अभिषेक शर्माला आऊट केलं. महत्त्वाच्या सामन्यात अभिषेक अवघ्या ५ धावा करून पॅव्हेलियनमध्ये परतला. यशने आपल्या शानदार गोलंदाजीने गुजरातच्या विजयात हातभार लावला. त्यानं पहिल्या दोन षटकात १८ धावांत एक बळी घेतला. यशचे पुनरागमन पाहून सोशल मीडियावर नेटकऱ्यांनी त्याचं कौतुक केलं.
वृत्तसंस्था
