संग्रहित छायाचित्र
नवी दिल्ली: अयोध्येतील राम मंदिराला आता एक वर्ष पूर्ण होत आहे. ५०० वर्षांपासूनचा प्रभू श्रीरामांचा वनवास संपला आणि अयोध्येमध्ये भव्यदिव्य राममंदिर निर्माण झाले. गेल्या वर्षी जानेवारी महिन्यामध्ये राममंदिर प्राणप्रतिष्ठा सोहळा पार पडला. अवघा देश त्यावेळी जय श्रीरामच्या घोषणांनी गरजत होता. या राममंदिर उद्घाटन आणि प्राणप्रतिष्ठा सोहळ्याला आज एक वर्ष पूर्ण होत आहे. या एका वर्षात राममंदिरात दर्शनासाठी येणाऱ्या भाविकांनी आणि त्यांनी दिलेल्या देणग्यांनी नवे विक्रम तयार केले आहेत.
बरोबर एक वर्षापूर्वी २२ जानेवारी २०२४ रोजी, अयोध्येत बांधलेल्या भव्य राम मंदिराचा उद्घाटन आणि 'प्राण प्रतिष्ठा' सोहळा मोठ्या थाटामाटात पार पडला. पंतप्रधान नरेंद्र मोदी यांच्यासह जगभरातील सेलिब्रेटी, राजकीय नेते या सोहळ्याला उपस्थित होते. राम मंदिराच्या 'प्राण प्रतिष्ठा' सोहळ्याला एक वर्ष पूर्ण झाल्यानंतर सध्या अयोध्यानगरीमध्ये विविध कार्यक्रमांचे आयोजन करण्यात आले असून जय श्रीरामच्या घोषणांनी शहर दणाणून गेले आहे. गेल्या वर्षी पौष महिन्याच्या शुक्ल पक्षात कूर्म द्वादशीला राम मंदिर 'प्राण प्रतिष्ठा' साजरी करण्यात आली होती, त्यामुळे अयोध्येत ११ जानेवारीपासून एक भव्य समारंभ आयोजित करण्यात आला होता. या भव्य सोहळ्यात लाखो भाविक रामलल्लाचे दर्शन घेण्यासाठी पोहोचले होते. आजही अयोध्येतील राम मंदिर आणि प्रभू श्रीरामांची मूर्ती फुलांनी सुंदरपणे सजवण्यात आली आहे. संपूण अयोध्यानगरीत भाविकांची गर्दी पाहायला मिळत असून प्रभू श्रीरामांचे दर्शन घेण्यासाठी लाखो भाविक शहरात दाखल झाले आहेत.
अयोध्येत राम मंदिराच्या स्थापनेपासून प्रत्येक दिवशी दर्शनासाठी भाविकांची लांब रांग पाहायला मिळते. हे ऐतिहासिक राम मंदिर पाहण्यासाठी आणि रामलल्लाचे दर्शन घेण्यासाठी केवळ देशातीलच नाही तर परदेशातूनही पर्यटक येथे येतात. याआधी दरदिवशी सुमारे ७० ते ८० हजार भाविक दर्शनासाठी पोहोचत होते, तर ५ जानेवारीपासून दररोज सुमारे दोन ते दीड लाख भाविक अयोध्येत दर्शनासाठी येत आहेत.
किती मिळाली देणगी?
गेल्या एका वर्षात राम मंदिराने सुमारे ४०० कोटी रुपयांचे उत्पन्न मिळवले आहे. राम मंदिराचे वार्षिक उत्पन्न फक्त एका वर्षात देशातील इतर मंदिरांच्या उत्पन्नाइतकेच झाले आहे. मंदिरात ५० लाख रुपयांपर्यंत दैनंदिन देणगी गोळा होते. गेल्या आर्थिक वर्षात राम मंदिराला ३६३ कोटी ३४ लाख रुपयांची देणगी मिळाली, तर आत्तापर्यंत राम मंदिराला विविध माध्यमातून ५०० कोटींची देणगी मिळाली आहे, ज्यामध्ये १३ क्विंटल चांदी आणि २० किलो सोनेही समाविष्ट आहे. श्री राम जन्मभूमी तीर्थ क्षेत्र ट्रस्टच्या मते, मंदिराच्या देणगी खात्यात आतापर्यंत ३२०० कोटी रुपये जमा झाले आहेत. श्री राम जन्मभूमी तीर्थ क्षेत्र ट्रस्टने दिलेल्या माहितीनुसार, आतापर्यंत सुमारे १८ कोटी रामभक्तांनी राम मंदिराच्या बांधकामासाठी वेगवेगळ्या बँकांकडून ३२०० कोटी रुपये दान केले आहेत. कथाकार मोरारी बापूंनी १२ कोटी रुपयांची सर्वाधिक मोठी देणगी दिली आहे. अमेरिका, कॅनडा आणि युनायटेड किंग्डममध्ये राहणाऱ्या मोरारी बापूंच्या विविध अनुयायांनी एकत्रितपणे ८ कोटी रुपयांची देणगी दिली. हिरे कंपनी श्री रामकृष्ण एक्सपोर्ट्सचे मालक गोविंदभाई ढोलकिया यांनी ११ कोटी रुपयांची देणगी दिली.
१८ कोटी भाविकांनी घेतले एका वर्षात दर्शन
एका वर्षात अयोध्येला भेट देणाऱ्या भाविकांची एकूण संख्या सुमारे १८ कोटींवर पोहोचली आहे. पर्यटन विभागाच्या आकडेवारीनुसार, जानेवारी २०२४ ते सप्टेंबर २०२४ पर्यंत अयोध्येला भेट देणाऱ्या भाविकांची एकूण संख्या १७.७६ कोटी असल्याचे सांगितले जात होते. यानंतर अयोध्येत अनेक मोठ्या घटना घडल्या, ज्यामध्ये मोठ्या संख्येने भाविक अयोध्येत पोहोचले. भाविकांचे आगमन अखंड सुरूच आहे.