संग्रहित छायाचित्र
नवी दिल्ली : जम्मू-काश्मीर येथील पहलगाम येथे झालेल्या हल्ल्यात २६ पर्यटकांचा मृत्यू झाला. या प्रकरणी आता एनआयएने तपास सुरू केला आहे. दरम्यान, रोज नवीन खुलासे होत आहेत. पहलगाम हल्ल्यात पाकिस्तानी हल्लेखोरांना काश्मीरी नागरिकांनी मदत केल्याचा संशय आहे. १५ स्थानिक काश्मिरी ओव्हरग्राउंड कामगारांची ओळख पटली आहे.
साहित्याची व्यवस्था करण्याव्यतिरिक्त, पाकिस्तानकडून शस्त्रास्त्रांचा साठा देखील मिळाल्याचे सांगण्यात येत आहे. तपास एजन्सींनी पाच प्रमुख संशयितांवर केंद्रित आहे, त्यापैकी तिघांना अटक केली आहे. पोलिस आणखी दोघांचा शोध घेत आहेत. पहलगाम हल्ल्याच्या काही दिवस आधी हे पाचही जण त्या परिसरात फिरत होते. या सगळ्यांचे फोन त्या परिसरात सक्रिय होते. इलेक्ट्रॉनिक पाळत ठेवल्याने एक चॅटींग समोर आले आहे. या चॅटमध्ये ताब्यात घेतलेले तीन प्रमुख संशयित पहलगाममधील पाकिस्तानी दहशतवाद्यांबद्दल आणि त्यांना कशी मदत करावी याबद्दल एकमेकांशी बोलत होते.
दोनशेहून अधिक संशयितांना चौकशीसाठी ताब्यात घेतले
दरम्यान, हल्ल्याशी संबंध शोधण्यासाठी २०० हून अधिक कामगारांना चौकशीसाठी ताब्यात घेण्यात आले आहे. हल्लेखोर अजूनही पहलगामच्या घनदाट जंगलात लपून बसले असतील असा संशय आहे. पहलगाम हल्ल्यात पाचही जणांच्या भूमिकेबद्दल पुरेसे पुरावे असल्याची माहिती समोर आली आहे.
एनआयए, जम्मू आणि काश्मीर पोलिस, इंटेलिजेंस ब्युरो आणि रॉ यांच्या तपासकर्त्यांचा समावेश असलेल्या संयुक्त चौकशी पथकाकडून इतर १० ओजीडब्ल्यूंची चौकशी केली जात आहे. कारण त्यांनी पूर्वी काश्मीरमध्ये पाकिस्तानी दहशतवाद्यांना मदत केली होती. २२ एप्रिल रोजी झालेल्या हल्ल्याच्या ठिकाणी ते होते. १५ स्थानिक दहशतवादी सहकारी दक्षिण काश्मीरमधील आहेत. मागील काही वर्षांत दक्षिण काश्मीरमध्ये झालेल्या अनेक हल्ल्यांमध्ये सहभागी असलेल्या पाकिस्तानी दहशतवाद्यांना त्यांनी मदत केल्याचा संशय आहे. या दहशतवादी सहकाऱ्यांनी पाकिस्तानी दहशतवाद्यांना साहित्य पुरवण्यास मदत केली, दहशतवाद्यांना जंगलात माहिती दिली आणि दहशतवादी हल्ल्यांमध्ये वापरण्यासाठी पाकिस्तानकडून शस्त्र मिळवली.
ताब्यात घेतलेल्या ओव्हरग्राउंड कामगारांची चौकशी सुरू
पहलगाम हल्ल्यातील दहशतवाद्यांना साहित्य पुरवण्यासह जंगलातील माहिती दिली. याबाबत आता कामगारांची चौकशी सुरू आहे. आम्ही १५ जणांना ताब्यात घेतलेल्या कामगारांकडून अधिक माहिती मिळवण्याचा प्रयत्न करत आहोत, अशी माहिती अधिकाऱ्यांनी दिली आहे.
पहलगाम हल्ल्यात चीनचा सहभाग?
पहलगाम दहशतवादी हल्ल्यानंतर देशभरातील गुप्तचर यंत्रणांपासून राष्ट्रीय तपास यंत्रणांच्या माध्यमातून या घटनेचा तपास केला जात आहे. या घटनेच्या तपासांतर्गत तपास यंत्रणांना चीनच्या एका संशयास्पद सॅटेलाईट फोनचा मागोवा लागला आहे. तपास यंत्रणांना चीनच्या एका ‘हुआवेई सॅटेलाइट फोन’चा तपास लागला आहे. पहलगाम हल्ल्यावेळी हा फोन घटनास्थळावर होता, अशी माहिती समोर आली आहे. हुआवेई ही चीन कंपनी आहे. या कंपनीच्या उपग्रह उत्पादनावर भारतात बंदीही घालण्यात आली आहे. घटनेवेळी हा फोन पाकिस्तान किंवा इतर कोणत्याही परदेशी स्त्रोताच्या माध्यमातून भारतात आल्याच्या संशय व्यक्त केला जात आहे. २२ एप्रिलला ज्यावेळी हल्ला झाला त्यावेळी या फोनवरून हल्ला करणाऱ्या दहशतवाद्यांशी चार वेळा संपर्क साधण्यात आला होता. पण घटनास्थळी मोठ्या संख्येने पर्यटक उपस्थित असल्याने हल्ल्यासाठी ड्रोनचा वापर केला गेला नाही. हल्ल्यापूर्वी आणि त्यादरम्यान किमान १० लोक एन्क्रिप्टेड अॅप्सद्वारे त्यांच्या हँडलरशी गप्पा मारत होते आणि त्यांना कॉल करत होते, असेही सूत्रांचे म्हणणे आहे.
