संग्रहित छायाचित्र
चौघांनी मिळून एका तरुणाला बेदम मारहाण केली. ही घटना शनिवारी (दि. २८) सकाळी सहाच्या सुमारास ऍप्टिव्ह कंपनीच्या गेटवर महाळुंगे येथे घडली.
रोहित तानाजी पेडणेकर (वय २५, रा. चिखली) असे मारहाण झालेल्या तरुणाचे नाव आहे. त्यांनी याप्रकरणी महाळुंगे एमआयडीसी पोलीस ठाण्यात फिर्याद दिली आहे. त्यानुसार जीवन रोहिदास शिंदे (रा. चाकण), शुभम (पूर्ण नाव पत्ता माहिती नाही) आणि त्यांचे दोन अनोळखी मित्र यांच्या विरोधात गुन्हा दाखल करण्यात आले आहे.
पोलिसांनी दिलेल्या माहितीनुसार, फिर्यादी हे महाळुंगे येथील ऍप्टिव्ह कंपनीमध्ये काम करतात. शनिवारी सकाळी सहा वाजता ते बस मधून कामावर गेले. बसमधून खाली उतरून कंपनीच्या गेटवर जात असताना आरोपींनी त्यांना अडवले आणि लाथा बुक्क्यांनी मारहाण करून शिवीगाळ केली. 'मला का मारत आहे' अशी विचारणा केली असता शुभम आणि जीवन शिंदे यांच्या दोन अनोळखी मित्रांनी त्यांना म्हटले की, तू आमचा मित्र जीवन शिंदे याला काल काय बोललास. त्यानंतर आरोपींनी लोखंडी कडयाने रोहित यांच्या डोक्यावर मारून दुखापत केली. महाळुंगे पोलीस तपास करीत आहेत.
