- परवाना प्रक्रिया पूर्ण होताच पुन्हा मिळणार केंद्रांना परवानगी
पुणे : शहरातील सोनोग्राफी केंद्रांच्या कारभारात पारदर्शकता आणण्यासाठी आणि नियमांची कडक अंमलबजावणी करण्यासाठी पुणे महापालिकेने मोठी पाऊल उचलले आहे. गर्भधारणा-पूर्व व प्रसव-पूर्व निदान तंत्र (लिंग निवड प्रतिबंध) कायदा (पीसीपीएनडीटी) कायद्यांतर्गत करण्यात आलेल्या ताज्या तपासणी मोहिमेत मंगळवारी (दि.७) परवान्याचे नूतनीकरण न केल्याबद्दल पाच केंद्रांमधील सोनोग्राफी मशिन्स सील करण्यात आल्या आहेत. महापालिकेच्या आरोग्य विभागाने या कारवाईला दुजोरा दिला.
पुणे महापालिकेचे सहाय्यक आरोग्य प्रमुख डॉ. सूर्यकांत देवकर यांनी दिलेल्या माहितीनुसार, या पाचही केंद्रांकडे परवाना नूतनीकरणाची प्रक्रिया गेल्या एक महिन्यापासून प्रलंबित होती. कायद्यानुसार, प्रत्येक सोनोग्राफी केंद्राला आपला परवाना ठराविक मुदतीत नूतनीकरण करणे अनिवार्य असते. नियमित त्रैमासिक तपासणी दरम्यान ही त्रुटी आढळल्याने प्रशासनाने तातडीने मशिन्स सील करण्याची कारवाई केली.
डॉ. देवकर यांनी स्पष्ट केले की, “ही कारवाई कोणत्याही बेकायदेशीर लिंगनिदान प्रकरणाशी संबंधित नाही. केवळ प्रशासकीय नियमांचे आणि परवाना अटींचे पालन न केल्यामुळे ही मशिन्स सील करण्यात आली आहेत. एकदा का संबंधित केंद्रांनी नूतनीकरणाची प्रक्रिया पूर्ण केली, की त्यांना पुन्हा कामकाज सुरू करण्याची परवानगी दिली जाईल.” या कारवाईमुळे शहरातील अन्य आरोग्य केंद्रांमध्ये खळबळ उडाली असून, प्रशासनाने आपले नियंत्रण अधिक कडक केल्याचे संकेत दिले आहेत.
पीसीपीएनडीटी कायद्याचा बडगा
भारतातील स्त्री भ्रूणहत्या रोखण्यासाठी आणि घसरते लिंग गुणोत्तर सुधारण्यासाठी पीसीपीएनडीटी कायदा लागू करण्यात आला आहे. पुण्यात सुमारे ९५० नोंदणीकृत सोनोग्राफी केंद्रे असून, या कायद्यानुसार दर तीन महिन्यांनी प्रत्येक केंद्राची तपासणी करणे बंधनकारक आहे. कागदपत्रे सादर करण्यात किंवा अहवाल देण्यात झालेली छोटीशी चूकही या कायद्यांतर्गत गंभीर मानली जाते.
कागदपत्रे आणि परवान्यांची वेळत पूर्तता करा
सील केलेली ही प्रकरणे आता महापालिकेच्या सल्लागार समितीसमोर मांडली जातील. समितीच्या शिफारशींनुसार, या केंद्रांची नोंदणी दोन ते सात दिवसांसाठी निलंबित केली जाऊ शकते. या कालावधीत केंद्रांचे कामकाज पूर्णपणे बंद राहील. प्रशासनाने सर्व नोंदणीकृत केंद्रांना आवाहन केले आहे की, भविष्यातील कायदेशीर कारवाई टाळण्यासाठी सर्व कागदपत्रांची आणि परवान्यांची वेळेवर पूर्तता करावी.
