संग्रहित छायाचित्र
पुण्यात अपघातांचे सत्र सुरूच आहे. मार्केटयार्ड-गुलटेकडी उड्डाणपुलावर झालेल्या अपघातात दुचाकीस्वाराचा मृत्यू झाल्याची घटना घडली आहे. या दुचाकीस्वाराला धडक देवून पसार झालेल्या दुचाकीस्वाराविरुद्ध गुन्हा दाखल करण्यात आला आहे.
नेल्सन पॉल डिसोझा (वय ५०, रा. ज्ञानेश्वर कॉलनी, कासारवाडी, मुंबई-पुणे रस्ता) असे मृत्युमुखी पडलेल्या दुचाकीस्वाराचे नाव आहे. या प्रकरणी डिसोझा यांचा मुलगा गैारीश (वय १९) याने स्वारगेट पोलीस ठाण्यात फिर्याद दिली आहे. त्यानुसार एका दुचाकीस्वाराविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, नेल्सन डिसोझा हे ३१ जानेवारीला आपल्या दुचाकीवरून दुपारीचारच्या सुमारास मार्केटयार्ड-गुलटेकडी उड्डाणपुलावरून जात होते. त्या वेळी भरधाव दुचाकीने दुचाकीस्वार नेल्सन यांना धडक दिली. या अपघातात डिसोझा यांच्या डोक्याला गंभीर दुखापत झाली. तसेच अपघात करणारा दुचाकीस्वार तिथून पसार झाला.
दरम्यान, जखमी अवस्थेत डिसोझा यांना रुग्णालयात दाखल करण्यात आले. मात्र उपचारांदरम्यान त्यांचा मृत्यू झाला. पोलीस उपनिरीक्षक शैलेश आलाटे तपास करत आहेत.