संग्रहित छायाचित्र
हिंजवडीतील आपत्कालीन पूर परिस्थितीला कारणीभूत ठरणाऱ्या, तसेच ओढे-नाल्यांवर अनधिकृतपणे अतिक्रमण करणाऱ्या विरोधात पुणे महानगर प्रदेश विकास प्राधिकरणाने (पीएमआरडीए) हिंजवडी पोलीस ठाण्यात ४ गुन्हे नोंदवले आहेत. संबंधित जागामालक आणि त्याठिकाणी व्यवसाय करणाऱ्यांनी संगनमताने ओढे, नाल्यातील नैसर्गिक पाण्याचा प्रवाह असलेल्या पात्रात अनधिकृतपणे बांधकाम केल्याने त्यांच्यावर पीएमआरडीएतर्फे ही मोठी कारवाई करण्यात आली.
हिंजवडी, माण आणि मारुंजी भागातील नैसर्गिक ओढे, नाल्यांभोवती अनधिकृतपणे बांधकाम, तसेच पाण्याचा प्रवाह अडवल्यासह परस्पर इतरत्र वळल्याने काही दिवसांपूर्वी हिंजवडीत पूरपरिस्थिती निर्माण झाली होती. या अनुषंगाने हिंजवडी येथील नाल्यांलगत किंवा नाल्याच्या पात्रात अनधिकृत बांधकाम करणाऱ्यांवर हिंजवडी पोलीस ठाण्यात ४ गुन्हे नोंदवण्यात आले. पीएमआरडीएचे आयुक्त डॉ. योगेश म्हसे यांच्या निर्देशानुसार संबंधित कारवाई करण्यात आली.
पीएमआरडीएच्या अतिक्रमण विभागाकडून होणाऱ्या कारवाईबाबत विकसक, शेतकरी तक्रारींचा सूर ओढत आहेत. संबंधित विभागाचे अधिकारी जाणीवपूर्वक कारवाई करत आहेत. तसेच काही अनधिकृत बांधकामांवर कारवाई करण्याकडे अधिकारी काणाडोळा करत आहे. याबाबत आयुक्त म्हसे यांच्‍याकडे अनेकांनी तक्रारींचे गाऱ्हाणे मांडले होते. त्‍यावरून आयुक्‍तांनी अनधिकृत बांधकाम विभागाच्‍या अधिकाऱ्यांना खडेबोल सुनावले आहेत. शासनाच्‍या नियमांप्रमाणे कारवाई करा. वाहतूक कोंडीला कारणीभूत असलेले सर्व अनधिकृत बांधकामे, नियमबाह्य अनधिकृत बांधकामे सरसकट पाडण्याची कारवाई करण्याची सूचना आयुक्‍तांनी दिल्‍या. त्‍यानूसार अतिक्रमण विभागाने शुक्रवारी (दि. ४) कारवाई करण्यास सुरुवात केली आहे. हिंजवडी, माण आणि मारुंजी भागातील नैसर्गिक ओढे - नाल्यांभोवती अनधिकृतपणे बांधकाम तसेच पाण्याचा प्रवाह अडवल्यासह परस्पर इतरत्र वळल्याने काही दिवसांपूर्वी हिंजवडीत पूर परिस्थिती निर्माण झाली होती. या अनुषंगाने अनधिकृत बांधकामे करणाऱ्यांवर हिंजवडी पोलीस ठाण्यात चार गुन्हे नोंदविण्यात आले. यासह मारुंजी भागात पाच ते सहा ठिकाणी कारवाई केली. या पैकी एका ठिकाणची कारवाई न्‍यायालयीन बाब म्‍हणून थांबवण्यात आल्‍याची माहिती पीएमआरडीए प्रशासनाने दिली.
या ठिकाणी नोंदवले गुन्हे
हिंजवडीतील गट क्र. २६२ येथे पंकज साखरे (जागामालक), गुरुकृपा मोटर्स, महावीर कुरिअर सर्व्हिसेस, सिटी सेल, हॉटेल मयूरी (विकसक) यांनी नैसर्गिक ओढे, नाले परिसरात अनधिकृत बांधकाम केले आहे. हिंजवडी गट क्र. १५२, २६३ या ठिकाणी शशिकांत साखरे, शालिवाहन साखरे (जागामालक), विठ्ठल तडकेवार, गुरुकृपा बँगल्स स्टोअर (विकासक). हिंजवडी गट क्र. २६२ या ठिकाणी पंकज साखरे (जागा मालक), सरकारमान्य ताडी विक्री केंद्र, भंगार दुकान (विकासक). हिंजवडी गट क्र. १५२, २६३ येथे शालिवाहन साखरे (जागा मालक), हिना चिकन, वाशिंग सेंटर यांनी ओढे, नाल्यावर अनाधिकृतपणे बांधकाम केल्याचे पुढे आल्याने विविध कलमान्वये गुन्हे नोंदवण्यात आले.
अनधिकृत इमारती पाडल्या
मारुंजी भागातील अनाधिकृत बांधकाम आणि इमारतींवर पीएमआरडीएच्या अनधिकृत बांधकाम व निर्मूलन विभाग गत काही दिवसापासून निष्कासन कारवाई करत आहे. यात मारुंजी गट क्र. ४५/१/२ येथील परिहार यांची जी+८, भिसेन यांची जी+४, चाकले यांची जी+२ या अनधिकृत बांधकामाचे निष्कासण पूर्ण झाले आहे आणि चौधरी यांची जी+५ या अनधिकृत बांधकाम असणाऱ्या इमारती पाडण्याचे काम सुरू आहे. यासह डॉ. खेनट यांच्या जी+५ या इमारतीचे स्ट्रक्चर पाडण्याची कारवाई सुरू (२० टक्के बांधकाम तोडले) असताना न्यायालयाच्या आदेशाने संबंधित कारवाई थांबवण्यात आले. उर्वरित बांधकामांबाबत पुढील आदेश प्राप्त झाल्यानंतर कार्यवाही करण्यात येईल, अशी माहिती पीएमआरडीएने दिली आहे.
