पुणे : दिघी परिसरात गुरुवारी (२ ऑक्टोबर) सायंकाळी दसऱ्याच्या दिवशी घडलेल्या हृदयद्रावक घटनेत ११ वर्षीय मुलाचा लिफ्टमध्ये अडकून मृत्यू झाला. अमेय फडतरे असे मृत्यू झालेल्या चिमुकल्याचे नाव असून, या अपघातामुळे फडतरे कुटुंबावर दुःखाचा डोंगर कोसळला आहे.
पोलिसांनी दिलेल्या माहितीनुसार, अमेय लिफ्टसोबत खेळत होता. जिन्याने वर जाऊन पुन्हा लिफ्टने खाली येण्याचा हा खेळ काही मिनिटे सुरू होता. मात्र, या खेळातच मोठा अनर्थ घडला. लिफ्टच्या दरवाजाच्या मधल्या जागेत तो अडकला आणि गंभीर जखमी झाला.
घटनेची माहिती मिळताच अग्निशमन दलाचे जवान घटनास्थळी धावले. त्यांनी रक्ताच्या थारोळ्यात अडकलेल्या अमेयला बाहेर काढले आणि तातडीने रुग्णालयात दाखल केले. मात्र, उपचारादरम्यान अमेयचा मृत्यू झाला.
ही घटना गुरुवारी दुपारी साडेपाचच्या सुमारास घडली असून, दिघी पोलीस याबाबत पुढील तपास करत आहेत. या दुर्दैवी प्रसंगामुळे परिसरात हळहळ व्यक्त होत आहे.
